Hadooh 122 tylli ki bomb kiwa ym pu em pdung kiwa nadooh ka thmabah wa ar (World War II) da chem ya ki ynne ka sngi na i chnong khappood Moreh wa em ha Manipur hajan u pood waka Myanmar.
Kini ki bomb da chem heipor wa pynmadan ya iwi i thaw yow chna yung ha Gangte Veng, Moreh heipor kamwa 10 waje i step ha i thaw u Thangkhotinlal Gangte, da pyntip ki pulit.
Ki pulit da wan ki cha ini i thaw yow rah ya kini ki bomb na ini i thaw yow leh ya iwa emkaam.
Kam wow pynkynmoo wa soo bnai nachwa haka 16 tarik u Naiynñiaw ha Moreh hi, da chem ya 27 tylli ki bomb kiwa ym pu em pdung kiwa nadooh ka thmabah wa ar, 43 tylli kiwa da dep pynemkaam wa 15 tylli ki synduk kiwa thylli kiwa da chem heipor wa pynmadan ya iwa i thaw yong u Kampu Doungel yow chna yung ha Lhangnom Veng, Moreh Ward No.9, hajan ka Power Substation.
Ya kam kini ki jait bomb da jooh chem leh na kiwi ki bynta ka Manipur na ki por cha ki por.
