U District Magistrate ka West Garo Hills da pynmih hukum u ynne ka sngi yow pynbna ya waroh kawi ka dong Cherangre waka dong Dobasipara wa em ha Tura kam ki Containment Zone neidaw wa em kiwa boon kiwa yoh COVID-19.
Kani ka Containment Zone toh kawa krehkaam nadooh myntu ka sngi hadooh wa pynmih hukum da kamwi wei da kyntu u leh yaki paidbah wow ya krehlang deiwa bood yaka hukum wow neh bait hapoh yung heiwa u CEO ka Tura Municipal Board u man u kam u Supervising Officer kini ki thaw.
Nadooh mynstep u sdang leh yei leh yaki Test kamjooh ki Health Screening ha kini ki dong heiwa ya kitu kiwa yoh COVID-19 kiwa leh Quarantine ha yung da e leh ya u Pulse Oxymeter deiwa da sikai ya kiwa pait yaki kammoh wow pynemkaam ya kini ki tiar.
Da leh ya ini yow pait hadooh katwon em Oxygen ha kiwa yoh ya uni u khñiang khamtam heipor miet.
Kiwa dang em ya uni u khñiang ha West Garo Hills da em ki 107 ngut heiwa ynne leh da em wa yap na uni u khñiang kiwa da poi waroh 10 ngut.