Ar ngut ki bru ha Karnataka da pyntikna toh kiwa yoh ya u jait COVID-19 wa thymme wa tip kam u Omicron wei da em sa 5 ngut kiwa yachem wa uwi na kini leh toh kiwa da chah ktah tangwa dang phah leh ya ka Genomic Sequencing yow tip da uyi u jait yoh ki.
Uwi wa yoh Omicron toh uwa 46 snem i rta u wym em wan neiwon neiwon wei da Test ya oo hadien wa iñdoh wei kjut doh u heiwa yei nongmuna u da chima ha ka 22-11-21 wei da phah leh ya ka Genomic Sequencing ha ka 24-11-21.
Neiliang u Chief Commissioner ka Bruhat Bengaluru Mahanagara Palike (BBMP), u Gaurav Gupta da ong wa ye u man wa uni u Omicron toh uwa da em chwa hapoh ka ri.
Uwi won uwa yoh Omicron toh uwa 66 snem uwa na South Africa uwa da poi ha Bengaluru ha ka 20-11-21 wei hadien wa Test da chem toh uwa yoh COVID-19 wei neiliang ka BBMP da phah ko wow leh ya ka Genomic Sequencing kawa da yoh Result ynne ka sngi.
Ya uni da pynchongkset hapoh Hotel wei hadien wa Test biang ya oo da chem toh u wym em de chah ktah u, kamtæ da chah wow lai u cha Dubai lyngba ka Bengaluru Airport neidaw wa da em chwa ki kaam yong oo.
Waroh ki 24 ngut kiwa yachem wa oo wa 240 ngut kiwa yachem pateiñ da dep wow booddien ya ki wei ym em kiwa chah ktah hadien wa Test.
Ya uwa 46 snem won da chim ya ka nongmuna yong oo ha ka 22-11-21 wa da Test hapoh ka NCBS Lab wei da chem toh uwa yoh ya u Omicron wei da rah won ya oo cha Hospital.
13 ngut ki bru wa yachem wa uni wa 205 ngut kiwa yachem pateiñ da booddien ya ki wei hadien wa Test 3 ngut na ki 13 ngut wa 2 ngut na ki 205 ngut toh kiwa yow COVID-19 wei da phah wow leh ya ka Genomic Sequence yow tip da uyi yoh ki.
Uni uwa 46 snem toh u wym wan na iwon iwon i thaw.
Yei le Genomic Sequence nachwa da chimpor 2 bnai yow yoh Result katwa katni da ye u yoh hapoh 8 sngi.
