I yap kiwa khih mylla mooyong dang pteiñ i hadooh kini ki sngi heiwa ha kani ka kynti da chem ya i metyap uwa tih mooyong na iwi u krem mooyong wa em ha Ledo, Tinsukia District ka jylla Assam ynne ka sngi.
Uni uwa da yap da tip kam u Kancha wei da suba wa da yap u heipor wa pynmih u ya u mooyong napoh krem.
Ya ini i metyap da em wa chem na tre uwi u loom hei step da kiwa kreh mooyong hi wei da wan chimkti noh da ki pulit ka Ledo PS wow leh yeiwa emkaam, wei ini man i ka sien wa ar wa da jia ha Ledo hi hapoh san bnai hadien iwa jia ha ka 4 Naikhynde u snem wa dadep.
Uni uwa yap ha u Naikhynde da tip kam u Suraj heiwa yei matyap u da chem hajan ka Tirap Colliery wa em ha Ledo hi wei da suba wa chah tynyap u neidaw wa pyrchang u wow tooh mooyong.
Ka chnong Ledo, Tirap, Tikak, Bargolai, Namdang wa Tipong Colliery toh kiwa em hapoh ka NEC Coal India Ltd Margherita, Tinsukia, Assam.
Da em won leh i tih mooyong wa pyrchah aiñ deiwa tih da ka Rat-Hole Mining ha kini ki thaaiñ wei da em kiwa boon wa yap wa leh yeini i rukom.
Discussion about this post