Ki 6 ngut ki bru na ka jaitbru Naga kiwa da wiar la kamwa chi bnai ha Manipur, da chem ya ki metyap yong ki hadien wa thooh ya ki da slem bha wei ini da wanrah i yei kynaad hapyrdi ki Naga wa ki Kuki wei chong sier ha Manipur.
Ka Manipur Police da ong ko wa da chem ya kini ki metyap hadien wa thooh ya ki da ki 450 ngut ki pulit deilang ki Central Reserve Police Force wa ka Assam Rifles.
Ya kini ki 6 ngut da rahbor na chnong Leilon Vaiphei ha ka 13 tarik u May.
Kini toh kiwa na chnong Konsakhul, Kangpokpi District wei da tip ya ki kam u Manu Thiumai, u Kenpibou, u Dilip Thiumai, u Phenrilungbou, u Kaliwangbou wa u Phenrongwibou heiwa ar ngut na ki, u Manu Thiumai wa u Kenpibou toh ki Pastor.
Ki heh pulit da ong ki wa ya ki metyap da chem hapyrdi ka chnong Leilon Vaiphei wa Kharam Vaiphei najan Konsakhul neiwa da chah rahbor ki ha ki kattu katni ngut.
Ini wan i hadien wa ki seiñ Naga da pynlait ki ya ki 14 ngut ki Kuki kiwa chah ksohbor ha Senapati District wei da pynlait ya ki hadien wa ka sorkar Manipur da kular ko ya ki seiñ Naga wow thooh ya kiwa wiar.
Ini i rahbor toh hadien wa joor i kynaad hapyrdi ki Naga wa Kuki hadien wa chah tynyap ki le ngut ki heh niam ka Thadou Baptist Association, heiwa ki seiñ Kuki da pynbaad ki wa da leh da ki seiñ kieñ suloi ki Naga.
Kamtæ da em i chah rahbor na waroh ki ar jaitbru wei da ye wow pynlait ya ki kattu katni ki Kuki ha ka 15 tarik u May katwa ki seiñ Naga da pteiñ ki wow ksoh ya ki 14 ngut ki Kuki wow dawa u tip cheiwon em ki 6 ngut wa dang wiar.
Neiliang ki pulit da pynman ki yei takit hajrong ini.
U Chief Minister ka Nagaland da kyntu u ya ki paidbah wow man kiwa jai-jai ha kam ini i por deiwa dawa wow pynchitom ya kiwa emkti.
Discussion about this post