Da chna ya ka Association wow yada ya ka Wah Lukha wei wow dawa na ka JHADC wow dam noh u lilam ya ka

Jowai: Ka Dorbar Chnong Sonapyrdi, East Jaiñtia Hills deiwa sñiawkhia ya i kylla rong ka Wah Lukha man la u snem da chim ko ya ka rai wow khut yalang ya waroh ki chnong kiwa em harood kani ka wah nadooh ka chnong Sakhri, Lum Tongseng, Shymplong, Borsora wa Kuliang ha ka 7 tarik uni u bnai ha yung skur ka Govt L.P. School Sonapyrdi heiwa da wan leh u Desous Pohshna uwa man leh kam u MDC ka thaiñ.

Ya kani ka yalang da pynlai da u Edimon Lamare uwa man leh u Waheh Chnong ka Sonapyrdi wei ha kani ka sngi da yoh yei pynche cha ki paidbah da u Daiapherbha Lamare uwa man leh u Secretary Chnong ka Sonapyrdi uwa da batai che hajrong ka bynta wei da paan leh ya i kyrchaan na ki chnong waphær waphær kiwa chong wa sah harood kani ka wah khnang wow ye u yada ya kani ka wah.

Da batai u leh wa nachwa kani ka wah riñ ko ya kiwa khwe dakha wow wan khwe cha kani ka wah tangwa katni hadien wa kylla rong Blue ka wah Lukha chiboon kiwa khwe duna bha wa wan cha kani ka wah.

Heijooh i por da beiñ u ya ka JHADC kawa empor du wow lilam ya kani ka wah chisien chisnem tangwa lada jia iwon iwon ya kani ka wah won ym jooh yoh por ko wow pait wow sylli ya ka.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da kyrpaad u ya ki paidbah wow ksohkti lang wa ka chnong Sonapyrdi khnang wow lai cha JHADC wow dam noh u lilam ya kani ka wah khnang wa ki bru kiwa chong wa sah ha tymbud kani ka wah u yoh ki u im ja næ kamai mylla sngi lyngba kani ka wah.

Da yoh leh yei klam na u Desous Pohshna uwa sñiaw yahaap wa e yumut yong ka Dorbar Chnong Sonapyrdi wei da kular u leh wow yarap ya ini i thmu yong ki.

Ha kani ka yalang da yoh leh i klam na u Waheh Chnong ka Sakhri, Lum Tongseng, Shymplong wa chnong Borsora kiwa da kyrchaan ya ini i yumut ka Dorbar Chnong Sonapyrdi.

Kamtæ khnang wow pynsmat ya ka rai kani ka yalang wei wow leh yeiwa emkaam da khut noh ya ka seiñ kam ka 6 Shnong Wah Lukha Association.

Kiwa kitkaam kani ka Association man ki kamni hawah:

1. President- Dringson Lamare
2. Secretary- Daiapherbha Lamare
3. Vice-President- Condrick Lamare
4. Assistant Secretary- Nai Kyndoh
5. Treasurer- Apstarlangki Syih
6. Adviser: (1) Desosus Pohshna (2) H.S Pyrtuh.

Wei da thung leh ya ki 12 ngut ki Executive Member kiwa kynthup ar ngut na ka wi ka chnong.