Shillong: I thmu yong ka sorkar jylla wow chna ya ki khyrdop wow pait yei psiah i mih ki baarjylla kiwa tip leh kam ka Integrated Facilitation Centre- Entry and Exit Point ye ko u chimpor sa khajak neibhah hadooh katni da dep u pynman ya ka pynsñiaw paidbah ko yow pynemkaam ya ki thaw yow booh ya kini ki Entry Exit Point wei dang sah won sa kiwi kiwa emkaam u leh ka sorkar ki wym pu ye ko u leh.
U Officer on Special Duty (OSD) u Aibanshngaiñ Swer ka Meghalaya Institute of Governance (MIG) kawa pynman ya ki pynsñiaw paidbah, ka Special Impact Assessment (SIA), da ong u wa na ki 17 tylli ki thaw wa ka sorkar thmu ko u chim yow chna ya ki tai ki Entry & Exit Point 15 tylli da dep phah ya ki report cha ka sorkar katwa 2 tylli dang lai i pynkhreh ya ki.
Katwa kiwi kiwa em khamtam ha Khasi wa Jaiñtia da biang ki wei iwa sah toh u pynkhreh yow phah ya ka report cha ka sorkar jylla yow leh ko yeiwa emkaam.
Katkam i ong u Swer (OSD), ki mat wa kongsan wow pynman yei pynsñiaw paidbah kynthup wow yoh u yaklam wa ki paidbah yow sñiawthooh ki yei thmu ka sorkar yow lait ki u chah kthah ha kiwon kiwon ki liang.
U Swer leh da pyntip u wa boon ki paidbah wa ki tre thaw smat ki u yakrehlang waka sorkar lait noh du ha iwi i thaw wa em ha Garo Hills wa ki paidbah ym sñiaw yahaap ki neibhah wa jngai ka khyrdop na ka sarok.
Ki thaw wa thmu wow chna ya ki Entry & Exit toh ha West Jaintia 2 tylli, ha Khanduli wa Saphai. Ha East Jaintia Hills 4 tylli, ha Malidor, Mooriap, Umkyrpong wa ha Laskein. Ha West Garo Hills 6 tylli, ha Singimari, Tangaon, Bangalkatta, Phulbari Ghat, Abhirampara wa ha Medhipara, katwa ha South West Garo Hills 2 tylli, ha Mirjumla, Junjoni. Ha Ri-Bhoi, 2 tylli ha 19th Mile bad ha 12th Mile wa kawi ha West Khasi Hills ka wow chna ha Athiabari.
Discussion about this post