Ka yung krehkaam yong ka Divisional Forest Officer, West Jaiñtia Hills Division, Jowai ha ka 16 tarik uni u bnai da pynkut ko ya ka tayaaw lehkmen Wildlife Week Celebration deiwa pynkup burom næ e Award ya ki bru wa yoh u pynlait im ya ki mrad wa boonjait wa tip kam ka Wildlife Samaritan Awards, kamjooh leh da i e khusnaam deilang ki Certificate cha ki skur, ki khynnah skur wa jop ha ki rynsan yakop waphær waphær wa da pynman chwa kani ka sngi.
Ha ka yalang wa da pynman ha Multipurpose Hall yong ka Kiang Nangbah Government College, Jowai, u C.P. Marak, IFS, uwa man u Chairperson ka Meghalaya Lokayukta wei uwa jooh man leh u Principal Chief Conservator of Forests & Head of Forests Force, ka sorkar jylla da man u kam u kongsan.
Hawa e i klam, u C.P. Marak da yaroh u ya ki bru wa pynlait im ya ki mrad deiwa ong ini toh i em kitkhlieh yong ki u yada ya ka rymaw, ki khloo ki mrad heiwa yooluti u leh wa neini chakhmat u mih chooh chooh ki bru wa kam kini wa em mynsien u ya krehlang yow yada u pynneh pynsah ya ki mrad wa ya ka rymaw.
Da kdaw u leh ya ki kyndon aiñ ka sorkar jylla wa kamjooh i kaamram yong uwi pa uwi wa chong chnong neibynta u yada ya ka rymaw, wei kamwa ka jylla Meghalaya toh kawa da yoh i kyrkhu lyngba ka rymaw nadooh ki mar pohkhyndaw, ki khloo ki ranem wa ki mrad wa boonjait, ong u yow ye yada ya kini emkaam i yakrehlang nadooh ka sorkar waka imlang sahlang.
Hawa kyruiñ u cha ka spah rymaw ka East wa West Jaintia Hills, ong u kamwa ar bynta na ka le bynta toh kiwa em hapoh khloo wa ki thaw wa em chnong bru wa ki thaw sah ki mrad ha ki khoo ki kjam. Kamtæ da kyntu u ya ki paidbah wow yada ya kini ki khloo neibynta ki pateiñ wa daw wan.
Hawa kdaw yei roi i seiñ chnong wa i thang ya ki khloo, da ong u wa man i iwa maa wa khroo ya ki thaw chong thaw sah ki mrad. Da e yukheiñ u wa i jia thang khloo ha East Jaintia Hills da hiar i na ka 766 ha u snem 2022-23 cha ka 348 ha u snem 2023-24, katwa ha West Jaiñtia Hills da hiar na ka 391 cha ka 243.
Kamtæ ngait skem u wow nang ye u pynduna wei da kyntu leh ya kiwa chong chnong wow syndong bha ki ha ki samoi wa raw tyrkhaw neibhah ha kini ki por ki phlang wa rkhiang wa ki chnat dieñ wa haap em ki hei maa nei diñ.
U Marak da kdaw u leh yei boon jait ki sim, ki mrad wa ki thawalieh kiwa em ha khloo Narpuh Wildlife Sanctuary, heiwa da khut u i sñiawthooh yumutlang yow yada ya kani ka spah rymaw, neibhah emkaam bha u pynneh pynsan ya kiwa boon jait wa em ha ka rymaw (Biodiversity).
Kiwi won wa e i klam kynthup ki ya u Dr. P. Nongtdu, Director, Jaintia Eastern College, Khliehriat & Honorary Wildlife Warden, East Jaiñtia Hills District; u B. Dally Kharpran, General Secretary, Meghalaya Adventure Association, Shillong wa u Dr. H. H. Mohrmen, Environmentalist & Honorary Wildlife Warden, West Jaiñtia Hills District.
Ha ka yalang wa pynlai da u S.P. Lamare, Beat Forest Officer, I/c Ratacherra Wildlife Beat, Ratacherra. Ka N. Laloo, IFS, Divisional Forest Officer, Jaiñtia Hills da e ko i klam yahkhmat, katwa u S. Law, Range Forest Officer, Umkiang & Jowai Wildlife Range da e u i klam e khublei.
Discussion about this post