Jowai: Ka seiñ Society for Urban & Rural Empowerment (SURE) kawi na ki seiñ kreh mon sñiawbha ha ri-loom Jaiñtia, da pyman ko ya ka e sikai wa chi sngi hajrong ka phang “Life Skill” ha ka 24 tarik uni u bnai ha ka yung skur Lyntijam Evening School kawa em ha Dongmihsngi, Jowai wei da yarap poisa wow pynman ya ka da ka yung krehkaam u District Planning Officer, West Jaiñtia Hills District.
Ha kani ka e sikai da wan ya chimbynta da ki khynnah skur miet ka Lyntijam Evening School, Caroline Colony Evening School wa ka Living Hope Evening school wei da pynlai ya ka yalang da ka Deadidakami Mohrmen hei emlang u Iaidbha Phawa, Assistance Research Officer Planning West Jaiñtia Hills District uwa man kam u kongsan.
U kongsan da klam u kajiak hajrong ka phang “Problem solving and decision making” deiwa khana leh yei i eh i khoo wa chem u hei yong oo samen i rta ha ka puræ puthi hadooh wa da haap u wow ieh yei puræ khlem yoh u pyndep yeiwa maya u.
Da e mynsien u ya ki khynnah wa chimbynta wa toh ki u pyrkhat bha chwa wow chim ya kawon kawon ka rai hei im yong ki kam ki khynnah skur.
Da yoh leh yei klam na u Rev H.H. Mohrmen u dkhot ka SURE uwa da khana chaphang i rukom krehkaam ka SURE wei da klam leh ka Principal yong ka skur Lyntyijam Evening School wei da yoh leh yei batai na ka Pasqualina Lamare wa ka Daka Bareh hajrong ka phang “Problem Solving,” wei ya i klam wa ar won da yoh naka Somja Phawa wa ka Coriniki Slong hajrong ka phang “Decision Making,” yow pynsñiawthooh ya kiwa wan chimbynta kammon wow chim ya ka rai lada yachem kiwon kiwon ki moochyntu hei rukom im yong ki yow lait u sihlet wei da pynkut da ki kyntien e khublei na ka Heibha Passah.
Discussion about this post