Da em yurim ki paidbah katni yow jied yaka Congress: Ampareen

Kawa yahkhmat yong ka Congress ha ka jylla, ka Dr. M Ampareen Lyngdoh da ong ko wa ki paidbah ka Mawryngkneng da em ki ya ka yurim wow nujor wei wow chim ya i rai neibynta wow pynjop ya u kyrtong ka Party, u Highlander Kharmalki ha ka Election chiteiñ samoi kawa daw man.

Kam wow kdaw wa ha kani ka samoi krehkaam kawa nadooh u snem 2018 hadooh katni da em 4 tylli ki Election chiteiñ samoi kiwa ka Congress ym ye ko wow jop wot ha ki Constituency wa da jop ha u snem 2018, katæ ka Selsella wa Ranikor, wei katni daw yakhun wow yoh biang leh ha ki ar tylli ki Constituency wa ka Party jop ko ya ka Election ha u snem 2018, kiwa haap wow pynman biang ya ka By-Election na i khlaad noh ki MLA, kitæ ha Mawryngkneng wa Rajabala.

Hawa kylli, kawa yahkhmat ka Congress da ong ko wa i rem noh na Selsella hadien wa khlaad noh u MLA, u Clement Marak toh neidaw wa da jia ha u jooh u snem wa ki paidbah ym pu tip ki ya ka rukom krehkaam yong kani ka sorkar MDA, wei i rem yong ka Congress na katai ka Constituency toh na i daw yong ka poisa wa i leh bor yong kiwa em ha ka sorkar, tangwa da ong ko wa ha kani ka Election ha Mawryngkneng ki paidbah da em ki ya ka yurim wei da ye ki wow pynyaphær.

Da ong ko wa ki phang wa ki eh wa yachem ki paidbah ka Mawryngkneng toh kiwa dang lai hadooh katni, nadooh i ku ka bai bordiñ, ka khayi pyrchah yaka aiñ ya u mooyong, i sahkut kari neidaw ki truck wa kiwi ki phang kiwa daw yarap ya ka Congress. Da ong ko wa ham mutdur wow pyndooh pyndam ya ka seiñ Congress, hanla jop da kawi ha ki By-Election ya ka Party.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Da ong ko wa ym ye wow nujor ya ka Election ha Mawryngkneng, Rajabala wa kiwei ki By-Election, wei pynsñiaw ko yei kyrmen i yatip lang wow bahkhlieh ya i thap Vote ki paidbah ha kani ka kynti, neibhah wa ki paidbah da tip wei da yoo ki yei krehkaam yong kani ka sorkar wa katni.

Hawa kylli chooh chooh, da ong ko wa kani ka By-Election ha Mawryngkneng ym pu ye wow ong wa daw em næ ym em yatoh wa ka Election 2023, tangwa kamwa paaw hadooh katni, ki paidbah ki kynmoo ki ya ka sorkar wa yahkhmat da ka Congress.