Ka Physical Efficiency Test (PET) neibynta kiwa yaleh kreh ha ka Civil Defence & Home Guards Department ha Shillong da hap pynpep ka chipor neidaw wa joor u slap.
Neiliang u Comingone Ymbon, Montri kani ka chnat da lai pait u ya ka thaw wow pynman ya kani ka PET ha Civil Defence & Home Guards Complex, Mawdiangdiang, Shillong wei da yachem u leh wa kiwa yaleh kreh kiwa toh u chim ya ka Physical Measurement Test (PMT) wa Physical Efficiency Test (PET) ynne, heiwa da chim noh ya ka rai wow pyndam chwa wei yow pait yei long i man i suiñbneiñ ha kini ki sngi wow wan.
Ka PET da pynman neibynta ki 445 tylli ki kreh wa lait wa kyntup ya ka 4 tylli ki kreh wow man kam ki Sub-Inspector, 284 tylli ki Guardsman, 17 tylli ki kreh Driver wa 140 tylli kam ki Non-Combatant Employees (NCE) wei ya ini da pynman ha ar tylli ki thaw kitæ ha Tura wa Shillong.
Kiwa da chah pdiang wow yaleh ya waroh kini ki kreh nadooh Sub-Inspector, Guardsman, Driver wa Non-Combatant Employee (NCE) da em ki 22,474 ngut.
Ya ka Physical Measurement Test (PMT) wa Physical Efficiency Test (Test) da sdang ha Tura nadooh ka 16 tarik u September 2024 wei da pyndep ha ka 26 tarik u September 2024, ka PMT wa PET ha Shillong ha Civil Defence & Home Guards Complex, Mawdiangdiang da sdang nadooh ka 30 tarik u September 2024 wei da toh u pynkut ha ka 8 tarik u October 2024.
Ya ka PET ha Shillong da ye wow pynman hadooh ka 3 tarik uni u bnai wei kiwa da toh u pynman ynne ka 4 tarik, 5 , 7 wa 8 tarik uni u bnai da hap wow pynsangeh ki kat wym pu yoo biang i long i man ka suiñ bneiñ.
Ka sorkar da rai ko leh wa kitu kiwa da pyndep wei da leh ya ka PET ha ka 2 tarik wa 3 tarik uni u bnai, ye ki wow leh biang ka sa chisien neibhah ha kitai ki ar sngi leh em i pynthut u slap.
Lada kwah ki wow leh biang ya ka PET, ki Marks wa da yoh ki daw pyndam ki wei daw kheiñ noh da iwa yoh ki hawa leh thymme ki ya kani ka PET.
Na ki 22,474 kiwa da chah jied wow yaleh ya ka PMT wa PET, kiwa da yoh wow yaleh da em ki 12,197 ngut kat hadooh ka 3 tarik uni u bnai. Heiwa kiwa da Pass ya kani ka PET ha Tura wa Shillong da em ki 6547 katwa kiwa Fail won ha Tura wa Shillong da em ki 5650.
Discussion about this post