15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Da i chah thngan wa le sngi wow pynbor ya ka sorkar wow e ya i dawa ka HYC

0 Comments
Advertisement ad1

Shillong: Ka seiñ Hynñiewtrep Youth Council (HYC) ynne ka sngi da pynbna ko wa daw sdang biang ko ya i yakhih yong ka nadooh ka 7 tarik uni u bnai wow dawa pynkrehkaam ya ki 14 tylli ki mat wa dawa ka seiñ na ka sorkar jylla.

Hawa yaklam wa kiwa pathai khubor ynne ka sngi u General Secretary ka HYC, u Robert June Kharjahrin da ong u wa hadien wa ka seiñ da chong ko ya ka CEC da rai ko wow pteiñ biang ya i yakhih pyrchah ya i wym mano ka Sorkar MUA-II ya ki mat dawa ka seiñ kawa da e leh ya ka dorkhat cha u Montri Rangbah ka jylla nadooh ka 23 Thohlakhmi (February) tangwa ka Sorkar ym em u leh ko iwon iwon leh hei yatoh wa ini.

Hajrong kini ki phang ka seiñ da khut yalang ko ya ki montri sorkar tangwa ym em u poi ki cha kani ka yalang wei hadien ini ka seiñ da lai pynsñiawthooh paidbah ko hajrong ini ha kylleiñ ka ri-loom Khasi Jaiñtia.

Chooh chooh da ong u wa ka seiñ da yachem ko leh wa ki kattu katni ki seiñ saiñ hima kiwa em ha ka liang pyrchah, kam ka UDP wa ka HSPDP, wot hadooh ki party ki wym em MLA kam ka KHNAM wa ka PDF, heiwa ka KHNAM da kular ko wow pynpsiah ya kini ki mat yong ka HYC ha ka Vision Document yong ka, katwa ka HSPDP nawon da rah ko 5 tylli ki mat wow chimkhia ko, katwa ka UDP hanlada kular ko, tangwa ympu em u leh ko kat iwa em leh.

Da ong u leh wa ka yakhih wa tip kam ka ‘Save Hynniewtrep Mission’ daw pteiñ ya ka nadooh 7 tarik uni u bnai heipor 10:00 waje i step na u mot sah kynmoo uwa yahkhmat warim ka seiñ KSU, u Bul Lyngdoh wa em ha Dhankheti ka wow pynbood yei chah thngan wa le sngi lynter hadooh ka 9 tarik.

Heijooh i por da ong u wa lada ka sorkar ym wanrah ko ya i yaklam hapoh ka yung dorbar tlang ya ki phang dawa ka seiñ khamtam kiwa yatoh wa i psiah i mih ki baar jylla katwa ngait, ka seiñ daw pynjoor ko yei yakhih i wow pynbna won hadien ka 9 traik.

Da pynkut u deiwa ong wa ki seiñ saiñ hima ymye ki wow pynpsiah ya kini ki phang dawa ka seiñ ha ki Election Manifesto yong ki, ka seiñ daw yalap pyrchah noh ko ya ki ha ka Election ka wow wan.

Da ong u wa ka seiñ daw pteiñ ko yei yakhih heipor wa pynman ya ka dorbar tlang dorbar tlang, wei yeini daw pyntip manda kut kini ki le sngi.

Share this:
Previous

Chna ka CKDS ya ka Farmer’s Club ha Psiar

Next

Emkaam wow pynneh yeiwa e ka rymaw yow yoh myntoi ka juk wow wan: Dr. R.C. Laloo