Da i lai paidbah mih kiwa chong chnong ka Ummulong wow dawa hiar chuki ya u Waheh Chnong, u Chairman wa u Secretary

Jowai: Ki paidbah wa chong chnong ka Ummulong, West Jaiñtia Hills District, ynne ka sngi da pynman ki da ka lai paidbah wow pyrchah joor wei wow dawa hiar chuki noh ya u Waheh Chnong yong ka u S.S. Langi kamjooh ya u Chairman ka chnong u B. Pohshna wa u Secretary P. Lamare hajrong wa thok wei chukor ki ya ki paidbah ka chnong kamjooh ya u Dolloi ka Elaka Jowai hadien wa da soi pyrtuid tooh ki du le ngut haka chithi cha u Dolloi wa kam wa kiwa chong chnong ym kwah de ki wow khut dorbar.

Ya kani ka chithi da thoh ki hadien wa da hukum u Dolloi ka Elaka Jowai wow khut pynman ya ka Dorbar Chnong haka 28 tarik uni u bnai neibynta wow pynbait ya ki kaam ka chnong kamwa da ood ki paidbah.

Tangwa ha ka chithi wa phah cha u Dolloi wa soi pyrtuid u Waheh Chnong, Chairman wa u Secretary da thok ki deiwa ong wa da chim ware i yei por ki bru neibhah du ha uni u bnai da khut dorbar hadooh le sien, itæ haka 1 tarik, 6 tarik wa 21 tarik wei ym em de na kiwa chong chnong kiwa kwah u khut dorbar.

Hadien wa yoo ki paidbah ya kani ka chithi da pynchrai ko ya ki heiwa kini kiwa kitkaam chnong da leh ki kamni neibhah ha ka 1 tarik toh ka Social Audit, 6 tarik won ka Public Hearing katwa ka 21 tarik won ka Dorbar pynkhooid chnong.

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

“Waroh ki paidbah da thrang bha ki wow yoh ya kani dorbar neibhah la kamwa 3 snem ym em uwa khut dorbar tæ neiyi i daw won manda poi kani ka kynti phah pyndam won kiwa kitkaam ya kani ka dorbar khlem tip ki paidbah” da ong ki paidbah ka chnong.

Chooh chooh da ong ki wa u Langi da man u kam u Waheh Chnong kattu la kamwa 10 snem wei ym jooh yoh de u pynman dorbar kattu da boon snem wei ym yoh de ki u pynthymme Waheh chnong.

Da ong ki leh wa ini da poi i hadooh uni u pood hadien wym biang de i rukom pynkrehkaam ya ka scheme 100 sngi hapoh kani chnong wei uni u Waheh Chnong da leh embor ware u, iwa da ktah joor ya ki paidbah.

Ya kani ka lai paidbah da sdang nadooh na Community Hall ka Ummulong deiwa rah ya ki placard, ki lama yong wei da kyriaw wow dawa hiar chuki noh ya ki hakhmat yung yong ki heiwa nyngkong da lai hakhmat yung u Waheh Chnong u S.S. Langi neitæ da lai won cha i yung u Chairman u B. Pohshna wa u Secretary u P. Lamare.