Shillong : Ki ar tylli ki seiñ ka TUR wa ka CSWO kamjooh wa ki seiñ kynthai hei emlang leh ki bru paidbah hadien wa dep pynman ki ya ka yalang ynne ka sngi ha Shillong da chim ki ya ka rai wow pynman da ka lai paidbah ha kani ka 11 tarik kam ka dak wow pyrchah yei chah chim kabu ka khynnah kynthai wa da jia ha Marvelene Inn, Rilbong.
Hei yoh u yaklam wa ki dkhot ka TUR da pyntip ki wa daw booh dorkhat ki leh wa u Chief Minister ka jylla yow pynhiar chuki ya u HDR Lyngdoh yow man ka takit ka wa khlem pait chilliang neibhah katkam ka aiñ POCSO nadooh ki tre kani ka Guest House, ki manager hadooh kiwa kreh da emkti ha kani ka kaam lada yohlaad ki u yah khynnah khian cha poh kani ka thaw yow leh ya ki kaam pyrchah ya ki khynnah kynthai.
Ha ka dorkhat leh daw dawa yow phah pynbna da ka Red Corner Notice kawa mut yow phah ya ka khubor kem ya u Julius Dorphang, MLA ka Mawhati lada em u heiwon heiwon. U Dorphang da mih pyrtuid u ha ka FIR wa booh pyrchah ya oo wa 5 ngut wa em kti wow man dalal wa dai ya ki kynthai wow lehkaam dakaid ki wa kynthup leh ya kiwa kreh ka Marvelene Inn, wa em ha Rilbong.
Daw dawa leh wow pyngat chooh ya kiwa boon ki kyndon ka aiñ POCSO kamjooh ya ki kyndon ka aiñ Criminal Amendment Act 2013 kawa krehkaam pyrchah ya kiwon kiwa kreh sorkar kam ki pulit wa kiwi kiwi ki wym chimkhia yei kaam yow yait nei leh chilliang ha ka takit ya kam kani ka mukotduma.
Neiliang ka TUR leh da khut lang ko ya waroh nadooh ki seiñbhalang ka jylla hadooh ki bru samen wow emlang ki ha kani ka 11 tarik.
Discussion about this post