Ynne ka sngi neiliang ki Laloo & Khon (Tpep-Pale) hapoh i yahkhmat u Wanmi HC Laloo kam u President ka seiñ chirup wa ki waheh ka kur wa ki khon da mih ki wow lai e snaam sñiawbha kam ka dak i lehwarom ya ka World Blood Donation Day wow kyntu ya kiwi wa ymhoi u tieñ u e snaam.
Ya ini i e snaam sñiawbha da pynman ha Blood Bank ka Civil Hospital wa em ha Panaliar, Jowai.
Chaw wow mih na yung da em ka yalang wa tbian hapoh i pynlai u President wei da yoh i klam na u waheh ka yung u Alwin Laloo uwa da e ya ki kyntien kitbok kitrwiang ya ki para kur.
Neiliang u Wanmi HC Laloo da e u ya ki kyntien ngoohblai kyntien dem.
Ha Blood Bank da yoh i klam na ka Dr. I. Khyriem, Senior Medical & Health Officer, Jowai Civil Hospital Blood Centre kawa da yaroh ya ka kur wa da wan chaphrang wow e snaam sñiawbha kamni neibynta kiwi ki bru.
Da batai ko leh ya i myntoi wa yoh na i e snaam sñiawbha.
Da yoh leh yei klam na u Wanmi HC Laloo uwa da khana yei yumut hajrong ini i e snaam sñiawbha wa ka thong wa ong “I maya wa kor tam” heiwa lym em i maya para i ym ye u pynman kam kani ka lehwarom.
Discussion about this post