Ki khon khynroo ka chnong Madur, West Jaiñtia Hills District kiwa em hapoh ka “Seiñ Khynroo Iaraplang Madur” ha ka 6 tarik uni u bnai da ye ki wow e kti ya ka yung wa pynchna thymme ki neibynta kawi ka manyung wa dooh wa duk ha kani ka chnong.
Kani ka manyung toh yong ka Ishka Muruh wa u Krel Suting kiwa em leh ya arngut ki khon, wei i jied pynchna yung kini ki khynroo ya kani ka manyung toh wa yoo ki najrong wa man kiwa dooh wa duk, i yung ki leh da jæd da sih wei maad ki leh yei kjut i chitom ha kini ki snem wa dep.
Ya kani ka yung da wan wow wai ya ka da u Pastor Rihok Laloo uwa man leh kam u kongsan hei emlang u Tymmen Wasan, u Kynmaw Laloo, u Waheh Chnong Madur, u Kamjooh Hi Siangshai, ki dkhot yong kani ka seiñ khynroo wa kynthup nadooh u President, u Heipormi Ryngkhlem, u Secretary, u Bijune Bhoi kiwa chong chnong wa kiwi.
Neiliang u Secretary ka Seiñ Khynroo Iaraplang Madur, ong u ha i lai luti dap chisnem pura ka seiñ, kani man ko ka yung wa pynchna nyngkong ki.
Wei i ye ki wow chna ya kani ka yung toh deiwa kyrchaan i yakrehlang ki para dkhot, neitæ da yoh yarap ki 3 ban ki Tin na u MLA ka thaaiñ, u Wailadmiki Shylla uwa man leh u Montri sorkar, i yarap na ki para wa chong chnong kamjooh kiwa na baar, em won leh ki wym ye u yarap da ka poisa da yarap ki da i bor wow yakreh wa ki tiar ki tar.
Heiyatoh wa ini i kaam wa bha kani ka seiñ khynroo, u waheh chnong ong u wa neiliang ka chnong Madur da e yarap ko da ki dieñ, ki moo wa u chyiap. Da pyn-eh-daw pyn-eh-nasib u leh ya ki yow nang ye ki u krehbha chooh chooh sam chakhmat.
U Pastor Rihok Laloo hawa yaroh yei kaam wa leh kini ki khynroo pynkynmoo u yei kyntien wa ong, “Suk utæ uwa pyrkhat ya kiwa dooh, u Blai daw pynlait u ha ki sngi wa jynjar saja”, wei hawa ong wa dooh ym mut wa ki dkhot kani ka seiñ man ki kiwa dooh næ kiwa yoh, neibhah i yoh næ mahajon ym chong hei em spah, tangwa chong hei mynsien.
Chooh chooh pynkynmoo u leh yei kyntien wa ong, katwa dang e dang yoh pdiang, katwa dang pynlut nang yoh nong. Wei i yoh ymtoh du kat ka spah ka phaw wow kyrkhu u Blai, tangwa ka spah wa khroo tam ha pyrthai toh i chait i khiah.
Ong u leh wa i yoh yei yung man i kyrkhu wa pynkmen tam ha pyrthai neibhah da lait na ka sngi u slap wa ka la’ær.
Kyntu u leh ya ki dkhot kani ka seiñ wow man kiwa yatylli, kiwa ya sñiawthooh yumut khnang wa ki kaam wa bha u nanglai ki chaphrang.
Discussion about this post