U montri rangbah ka jylla, u Conrad K. Sangma ynne da lai sylli u ya i kreh ya ka Shillong International Centre for Performing Arts and Culture (SICPAC) kawa em ha Mawdiangdiang, heiwa i kreh da jan dep i.
Ya ini i lai sylli da synraan lang leh da u Commissioner and Secretary, ka chnat Arts and Culture, u F. Kharkongor, heiwa da batai che ya u Conrad heiyatoh wa ki kreh ha kani ka thaw kawa da jan dep wei i kreh man i iwa lai bait.
Da pyntip leh wa ya kani ka thaw daw ekti cha ka sorkar hapoh uni u snem krehkaam (Financial Year) neibhah i kreh wa da dep da man i waroh 83%.
Ini i kreh ha kani ka thaw da kynjoh i lut hadooh T. 108 Klur lyngba i yoh yarap poisa na ka Ministry of Tribal Affairs, Govt. of India kawa da kular wow e sa kamwa T. 12.85 klur neibynta i che wa ki tanghæng (Light and Sound Show) ha ki ar tylli ki rynsan (Auditorium) wa kynthup ya ka Black Box wa ka Little Theater.
Da antaad leh wa i lut neibynta ka Sound wa ka Lighting System wa kiwi kiwi da chaniah ha ka North Eastern Council (NEC) hei lut iwa T. 10 klur. Neiliang ka State Level Empowered Committee da tyrwa ko yeini wei dang yang wow pdiang ka NEC yei jooh.
