U Symbood Montri Rangbah ka jylla uwa pait leh ya ka chnat kaam pohyung (Police), u Prestone Tynsong da pyntip u wa i thap kreh pulit hapoh ka jylla da jan poi noh i cha wakut.
Hawa yaklam wa kiwa thoh khubor, u Prestone da ong u wa i pynpsiah kaam ha ki kreh wa lait ha ka chnat pulit da kut ko kattæ wei ka chnat dang pynkhreh ko wow pynlang ya ki Result chwa wow pynbna paidbah.
Heiyatoh wa i pynbaad wa em i leh tooh heipor wa thoh Exam, u Symbood Montri Rangbah da ong u wa ka sorkar da phah ko ya ka Director General of Police (DGP) wow takit bniah ya ini i kaam. Tangwa hadien wa da bichaar bniah ya ka Report na waroh ki thaw wa thoh Exam ha kylleiñ ka jylla, ka chnat da chem ko wym em iwon iwon i leh thok.
Kam wow pynkynmoo wa uwa yahkhmat ka Liang Pyrchah, u Dr. Mukul Sangma ha ki bnai wa dadep da dawa u na ka sorkar wow pynman biang yei yaleh Exam thung kreh pulit deiwa pynbaad wa em i leh thok.
Hawa yatoh wa ini, u Symbood Montri Rangbah da kyntait u warr yeini deiwa ong wym em i pyrkhat wow pynman biang deiwi ya ka Exam thung kreh pulit.
Discussion about this post