Ka Health Care Centre ha Lumbihsyntu Bishop’s House Jowai, ya kawa da chna da ka Society of St. Vincent de Paul (SSVP) Jowai Area Council, Bishop Jowai, i kreh ha ka da lai bha i chaphrang wei kattu dang sah sadu kattu katni ki bynta donhi, da ong u Fr. Ferdinand Dkhar uwa man leh u Administrator ka Jowai Diocese.
I em kani ka Health Care Center ha Bishop’s House daw yarap bha ko ya kiwa kreh ka Bishop’s House, kiwa kreh ka Jaiñtia Hills Development Society, ya ki khynnah kiwa em ha ka Child Line Centre wa ya ki paidbah leh kamjooh wa kiwi kiwi.
Chooh chooh i em kani ka Health Care Centre daw man ko leh kam ka thaw wa e sumaar wa rap jhan namo ka ‘First Aid’ neibynta ki bru kiwa emkaam yarap chwa wow lai ki cha Hospital.
Ha kani ka thaw hajrong ki dawai sorkar daw booh leh ya ki Doctor, kiwa e dawai kynbat (Khasi-Pnar) namo ki Herbal Medical Treatment.
Neiliang u MM Thaiang uwa man kam u President ka Society of St. Vincent de Paul, Jowai Area Council, Jowai Diocese uwa man leh heijooh i por kam u Project Officer ka SSVP ka Shillong Central Council Archdiocese Shillong da ong u wa i em ki Doctor Kabiraj ha kani ka Health Care Centre daw man ko kam chibynta wow yarap ya ki bru kiwa emkaam dawai kynbat wei u man i leh kam wow pynchlur wei wow e mynsien ya ki hei wow pynneh pynsah ya ki rukom sumaar wa i e dawai Khasi-Pnar.
Da pyntip u leh wa hadien wa wai ya kani ka thaw sumaar, ka Society of St. Vincent de Paul daw ekti ko ya ka cha ka Jaiñtia Hills Development Society kawa em ha Bishop’s House.
