Ka 100 Run na u Josiah Momin wa ki 5 Wicket na u Manish Sharma da pynjop ko ya ka Meghalaya da 133 Run ha ka sngi nyngkong ka Vinoo Mankad Trophy (One Day Tournament U-19 Boys) pyrchah ya ka Arunachal Pradesh.
Ka Arunachal da jop ko ya ka kylla khelm ha Ranchi wei da jied ko wow kawang bol nyngkong, i rai wa yoo kam iwa toh hadien wa haap ki arngut kiwa wai yei kamai Run ka Meghalaya deiwa kamai du 24 Run donhi.
Tangwa u Momin da wan u wow kamai 109 Run na ki 111 tylli ki bol, iwa da man palat chiteiñ iwa ye ki u kamai iwa 217 Run. U Captain Kevin Christopher (40 na 77 bol) da pynyoh lok u ya u Momin heiwa da kamai lang ki 121 Run neibynta u Wicket wa le.
U Momin da yoh u ya ka 50 Run na ki 72 tylli ki bol katwa sa ya ki 50 Run won da yoh u na ki 35 bol. Waroh da dat u 14 tylli ki 4 Run wa 4 tylli ki 6 Run.
U Momin da haap u ha ka Over wa 43 heiwa da yarap sa 30 Run deialng wa u PM Santosh uwa kamai 16 ngut chwa wow haap u ha ka bol wa khaddooh hadien wa kamai waroh 217 Run.
Ka Arunachal da sdang ki dei miat khlem da dooh Wicket hadooh ka 15 Over tangwa ym ye ko u kamai katkam wa emkaam.
U Sharma da pynhaap u ya waroh ar kiwa sdang yei kamai Run wei da yoh u sa le ngut yow yoh waroh 5/24 na ki 10 Over.
Kiwi ki soo ngut kiwa kawang bol ka Meghalaya leh da lehbha ki heiwa u Gavineal Marpna da yoh u 2/16, katwa u Waldo A Sangma, u Santosh wa u Bharat Gurung waroh da yoh ki mar 1/14 heiwa ka Arunachal da haap lut ki Wicket ko deiwa kamai 84 Run.
Ka Meghalaya daw yachem ko wa ka Nagaland mynstep.
