Kam chibynta i tipmit ka Rotary Club Jowai ya ki kaam ka Simi Khongthiang kawi na ki kynthai wa da bna naam hei chna phlim pynmih phlim hapoh ka jylla Meghalaya, hei janmiet ka 16 tarik uni u bnai da e burom ki ya ka da ka Award ha ka yalang wa da pynman ha Infinity Restaurant Mooralong, Jowai.
Ya kani ka Award da wan wow e kti da u Rtn. Rajesh Batra, Assistant Governor Zone-9 uwa man leh kam u kongsan ha kani ka yalang kawa tip kam ka Vocational Excellence Award cum Felicitation Ceremony, hei sakhilang ki dkhot ka Rotary Club Jowai wa kiwa chah khut sñiawbha.
Ka Simi Khongthiang hawa klam ong ko wa hawa sñiawsuk ya iwon iwon i kaam najrong wow kreh chitom, ye u man kynrad yeitæ i kaam.
Kam ka bei yong ki 3 ngut ki khon, ong ko heipor wa sdang ya kani ka kaam man iwa eh wa khor ya ka, hanla kattæ leh katwa em won ko i mynsien wym hoi u randien, ha u snem 2013 sdang ko u yoo ya u soh i kreh chitom lyngba i yoh ya ka Award ‘Best Script Writer’ ha ka jylla lyngba i thoh ko ya ka phlim “Da Theh Lut” kawa man leh ka Khasi Film Award wa nyngkong.
Da pynkynmoo ko wa wot ka phlim wa dang dep pynmih ko “Ka Chithi” ha kani leh da yoh ko yei naam kam ka Best Director ha Northeast yong u snem 2024.
Kamtæ da ong ko wa i kreh chitom wei rai kut rah ko yei naam i burom ha iwon iwon i thaw.
U kongsan hawa e i klam ong u i jied wow e Award ya kani ka manbei man sakhiat iwa chongnia lyngba i parom yong ka wa da khana da u Rtn R.Nongtdu, PE ha kani ka yalang.
Deiwa ong leh ini i tipmit man i iwa khian, tangwa yeini i naam i burom won ye u ksoh rta.
Neitæ kam ki bru wa emkaam i kyrchaan i yarap kylliang la ha iwon iwon i kaam wa khih wa kreh, ong u emkaam u lehbha næ wanrah iwa rap phær heitæ i kaam wa leh khang wa kiwi leh u wan ki chakhmat wow e i tipmit.
Ha kani ka jooh ka sngi ka Rotary Club da pynkup burom haroh ko ya ki para dkhot wa da ku kyrdan hei kaam wa kreh wa khih ki.
Discussion about this post