Ki seiñ khynroo kiwa dang lai puræ wa em ha ka thaaiñ mihsngi yong ka ri India ynne ka sngi ka 11 tarik da pynbna ki kam ka sngi kawa doom ya ka thaaiñ neibhah ha kani ka jooh ka sngi ka sorkar India da mynjur ko wow pynman aiñ ya ka Citizenship Amendment Bill cha ka Citizenship Amendment Act ha u snem 2019.
Ha ka jylla ya ini i pyrchah da yahkhmat da ka Khasi Students’ Union, hadien wa ka North East Students’ Organisation (NESO) da pynbna ko ya ka 11 tarik kam ka sngi “Black Flag Day” neidaw wa ka sorkar pyrdi da pdiang ko ya kani ka Bill wot hapyrdi i pyrchah.
Ka seiñ KSU kawa emlang hapoh yong ka NESO da pynman ko ya kani ka pyrchah ha Shillong deiwa wah ya ki lama rong yong wa ki Banner wa thoh pyrchah ya ka CAA wei wow dawa pynkrehkaam ya ka ILP.
Kam wow pynkynmoo wa ka sorkar India da mynjur ko ya ka CAA wow e laad ya kiwa khian paaid na Bangladesh, Afghanistan wa Pakistan kiwa toh na ka niam Hindu, Jain, Sikh, Buddhist, Parsi wa Khristan wow man kam kiwa chong chnong wa pura yong ka ri India.
