Jowai : Ynne ka sngi ka 19 Bn. BSF kawa man leh kam ka ka chipai yada ya ki kappood ka Ri India da pynman ko ya ka Civic Action Programme wa ka Free Medical Health Camp ha ka chnong Huroi, East Jaiñtia Hills.
Kani ka programme toh da pynman kam ka lad wow e yarap ya ki chnong kiwa jngai wa kiwa ym lait surok kiwa em ha khappood ka ri khamtam u wanrah yei yajan ki paidbah wa kini ki chipai ka BSF.
Ha kani ka sngi da wan u wai ya ka programme da u DIG, Sector Headquaters BSF Jowai u ND Bahugana hei emlang u Commandant ka 19 Bn BSF, u PS Bhatti hei yaemlang ki waheh chnong wa ki paidbah wa ki khynnah skur.
U Bahugana kam u Kongsan da khana u ya ki paidbah wa ka BSF ympher lada katwon sahdien ka chnong leh, u yada bait ko ya ki paidbah ka chnong wei da kyntu u leh ya ki paidbah wow man ki kiwa yakrehlang neibynta i bha i miat ka chnong wa ka ri waroh kawi.
Ha kani ka sngi da saam ya ki munakot, ki let ki khulom cha ki khynnah skur wa ki tiar plastik kam ki chuki ki top wa ki sula leh bol cha ki Sports Club.
Ha kani ka sngi ki BSF da e sumar mynkna ki næ ka Free Medical Camp cha ki paidbah wa ki khynnah heiwa da wan ar ngut ki Doctor ka BSF wei da saam leh ya ki dawai mynkna cha kiwa emkaam.
Na kani ka e sumar mynkna da yoh myntoi hadooh kamwa 200 ngut ki khynnah kiwa hapoh 10 snem i rta kamwa 100 ngut ki manbei wa kamwa 70 ngut ki chynrang wa ki manpa.
Hei yaklam wa ki Doctor da ong ki wa boon hi chitom ki nei rukom riñ mynsien næ “Respiratory Infection” khamtam ki khynnah. Ki paidbah kiwa yoh yarap ha kani ka sngi kynthup ki ya kiwa na ka chnong Huroi, Harai wa kiwi kiwi ki chnong wa marjan.
Chooh chooh ki paidbah da yaroh ki ya ki chipai ka BSF wa ym du ynne ka sngi tangwa dei langær manda emkaam ki paidbah ym jooh kyntait ki khlem yarap ya ki.
Discussion about this post