U Director General of Police (DGP), u Dr. LR Bishnoi da ong u wa i jia chah lehbeiñ u Doctor ka chnat ri mrad ha ki chipai BSF man ko kawa sñiawsih, wei pynrap u wa em i sñiawthooh bakla neidaw yong i wym sñiawthooh ktien.
Neliang u Symbood Montri Rangbah ka jylla uwa pait yaka chnat Kaam Pohyung, u Prestone Tynsong da khut u ya u IG ka BSF Meghalaya Frontier wa kamjooh ya u DGP ka jylla wow yaklam hajrong i chah lehbeiñ ha ki BSF ya u Doctor ka chnat Veterinary, u Dr. Seiboklang Buam haka 11 tarik uni u bnai.
U DGP da khana u wa ha ka yalang da yaklam leh ya kiwi de wa da jia chah pynbaad ki BSF wa pyndik ki ya ki paidbah ha khappood, wei da chim yei rai wow chna noh yaka Coordination Committee neibynta wow em i ya krehalang ha waroh ki thaw ha khappood.
Da khana u wa yaka Committee daw khlieh da ki sahep Sub Division wei daw yachem wei wow ya phyllu ki man-u-bnai ryngkat wa kiwa yahkhmat yong ki chnong khnang wow em i chaniah hapyrdi kiwa chong chnong wa ki BSF.
Hajrong i jia ya u Dr. Buam, u DGP da ong u wa ki BSF da phah takit ki wei neiliang u IG ki BSF da kular u wow chimkhia ya ini i kaam wei daw pyntip yeiwa mih nei takit khnang wow yoh u leh yeiwa emkaam.
Katkam i khana u DGP, yaka Coordination Committee daw pait da ki Sub Divisional Officer, wei daw emlang leh ki Sub Divisional Police Officer, ki Company Commander yong ki BSF wei kamjooh kiwa yahkhmat ha ki chnong.
Discussion about this post