Jowai: Ka yungbichaar wa ha khlieh dooh ka ri India, ka Supreme Court (SC) ynne ka sngi da pyntip ko wa daw chna ko ya ka dhab kiwa bichaar (Bench) ka wow pait ya kiwa boon ki mukotduma hei yatoh wa u Aadhaar.
Kani ka dhab kiwa bichaar kynthup ki ya u Chief Justice u Dipak Misra, Justice AM Khanwilkar wa u Justice DY Chandrachud.
U Attorney General u KK Venugopal da pyntip u cha ka Supreme Court wa ka sorkar pyrdi ym pynyinsur de ko ya ka tarik wa da booh khaddooh wow pynyabi ya u Aadhaar wa kiwa boon ki Scheme sorkar, ki Bank Account wa ki telephone number.
Da mih i dawa wow kylla ya ka tarik wa khaddooh hadien kiwa boon da e mukotduma ki pyrchah ya u Aadhaar deiwa ong wa tyngkheiñ u yei hok samen ki paidbah (Right to Privacy). Kam wow pynkynmoo ki 9 ngut kiwa bichaar ka Supreme Court da e ki ya ka rai wa i hok yong samen ki bru toh iwa da e ka riti synchaar ka ri wei ym em wa ye u pynbor ya ki tre ri wow leh ki yei wym kwah ki.
Kiwa e mukotduma da ong ki wa i phah ka sorkar wow pynyabi lyngba ka Unique Identification Authority of India (UIDAI) ya ki Bank Account, ki Mobile Phone wa kiwi kiwi man ko pyrchah ya ka riti synchaar ka ri wei katkam ka kyndon Article 21 yong ka Constitution da pyrchah ki leh ya ka Central Bureau of Secondary Education wa pynbor ya kiwa puræ wow leh ki ya ini chwa wow yaleh Exam ki.
Ha ka 25 tarik uni u bnai ka sorkar pyrdi da ong ko wa da e por ko hadooh ka 31 tarik u Wisu (March) ya kiwa ympu em Aadhaar wow leh ya ini waroh katwa ya kiwa da em Aadhaar u neh ko kamjooh.
Ka Supreme Court leh da kylli ko ya ka sorkar West Bengal wa ha kayi ka yurim wa pyrchah ko ya u Aadhaar ha ka mukotduma yong ka wei da phah ko leh ya ka Montri Rangbah kani ka jylla ka Mamata Banerjee wow e ko da ka mukotduma hei pyrtuid yong ka.
Daw chong bichaar ya ini ha ka tayaw wa khaddooh u Khonchonglad (Nov).
Discussion about this post