Da ka District Award cha kiwa sikai chirup ki rwai ki chaad na ki khynnah ha ka Teachers’ Day ha Jowai

Ka yung krehkaam ka District School Education Officer, West Jaintia Hills, ha ka 5 tarik uni u bnai da khutlang ko ya waroh kiwa sikai ka District ha District Library Auditorium, Mynthong, Jowai yow leh burom kyrpang ya ka sngi yong ki namo ka 65^th Teachers’ Day wow tipmit leh yei chakri wa kordor yong ki heiyatoh wa i puræ puthi.

Ha kani ka sngi da wan emlang u Montri ka chnat Education, u Lahkmen Rymbui kam u kongsan, u Kyntu Shullai, Assistant Commissioner uwa man leh u BDO ka Laskeiñ C&RD Block, West Jaiñtia Hills District kam u symbood kongsan, chirup i emlang ka District School Education Officer, ka Dr. Wa I Sa Sumer, ki sahep ka chnat puræ puthi, kiwa sikai, ki khynnah skur wa kiwi.

Neiliang u Montri hawa klam da e khublei u ya kani ka sngi kyrpang kiwa sikai deiwa yaroh leh yei kreh chitom yong ki u pynwandur yei puræ puthi ki khynnah.

Pynkynmoo u wa i kaamram kiwa sikai kylla i ha deilang i kylla i rukom puræ puthi, na itæ i daw emkaam u pteiñ i puræ wei pynpliah ya idæ khnang yow ye u pynbiang yei kylla wa emkaam ki khynnah skur.

Da kyntu haroh u ya kiwa sikai wow man kiwa e bor e mynsien ya ki khynnah, khamtam u yarap ya ki yow jop ki nei chah ban wa i khia hei im ki deiwa wanrah i chaniah ha idæ. Pynrap haroh u wa i stat i tip toh u tam i bar ya ki Marks wa yoh, ki Certificate wa yoh wa ki kot wa puræ dei wow pynlai yumut leh hei wow pynku yei sap wa em ki khynnah.

Hawa kyruiñ won u yei emkaam ka Teacher Eligibility Test (TET) neibynta kitu wa da sikai chwa, u Lahkmen da pynsñiaw u i sñiawkhia yei ood yong ki khamtam kitu kwa da sikai da boon snem, heiwa da pyntip u wa yei por wow pyndep MTET da pynslem na u 2027 cha u 2028, deiwa e khublei leh ya kiwa sikai kiwa da Pass ya ka MTET.

Da e khublei haroh u ya kiwa yoh khusnam yong ka State wa District heiyatoh i chakri yong ki ha ka puræ puthi.

Neiliang u symbood kongsan hawa klam pynsñiaw u i sñiawngooh ya kiwa sikai heiyatoh i e kti wei kreh chitom yong ki u pynwandur ya ka mynried.

Ong u leh wa kiwa sikai ym du wa man ki kiwa rah i che hei stat wa i nang i tip, da pynskem wei sikai ki leh yei man miat man bha wei tei yei man rynyieñ ki khynnah skur.

Kyntu haroh u ya ki khynnah wow maya wei burom ya kiwa sikai deiwa bood yei sikai wa da yoh, wei u heh u san leh deiwa em i kitkhlieh kam kiwa chong chnong wei u man ki kiwa yahkhmat yong ka mynried.

Ha kani ka sngi da saam leh ya ki District Award cha kiwa sikai wa chongnia u yoh na ki kaam wa chakri ki hei pure puthi, kitæ kynthup ki ya ka Phrangki Pran, Assistant Teacher, Thangrain Lower Primary School wa u Kissme Sungoh, Assistant Teacher, Nartiang Presbyterian Upper Primary School.

Yei naam Best Guide Captain Award da yoh ka Lamisakani Dkhar, Lissi Pearl Secondary School, Mukhla.

Da pynchongchit chooh chooh ya kani ka sngi da i rwai i chaad, i puræ Poetry na ki khynnah skur.

Yei klam pdiang da yoh na ka DSEO, ka Dr. Wa I Sa Sumer katwa yei klam e khublei da e ka W. Nonghuloo, SDSEO, Amlarem.