Ka seiñ Khooid Ya Ka Myntdu ynne da khut ko yaka dorbar pyrkhat kaam yei bhah ka Wah Myntdu ha Yungwalieh ka Chilliangraij, Jowai heiwa ki waheh wasian, ki manbei manpa, ki khynroo khyllood ka chnong Jowai kiwa em i sñiawkhia yei man ka Wah Myntdu ha kini ki sngi da wan ki wow ya embyntalang.
U Khroo Lamsalanki Pariat kam u President wa u chongknor ha kani ka sngi da e u ki kyntien yahkhmat deiwa pdiang burom wei khana pynsñiaw u yei lai luti ka seiñ chirup wa ki bor sorkar hei wow yada ya ka Wah Myndtu wa ki soodong sookun yong ka katkam ki kyndon yong ka NGT.
Hadien i khana, da pynsniaw u ya ki kaam wa da leh wei rukom lai luti ka sorkar wow e yada ya ka Wah Myntdu ha kini ki sngi, da chimbynta won leh wow yaklam ya tuklar da ki khynroo khyllood, ki manbei manpa wa ki waheh wasian wei da mih leh ka rai yow pynkhlan chooh yei rukom krehkaam ka seiñ wa da toh i por wow pynman ki jait yalang wow yaklam pynsñiawthooh ha man ki dong ki chnat yei kamraam kam ki tre ri tre muluk wa em tawiar ka Myntdu.
U pynkhlan chooh yei rukom krehkaam heiyatoh wei thmu u yada, pynbha ya ki rood ka Myntdu dei wow khut yaka dorbar kyrpang ki Dolloi, ki Waheh Chnong, ki Secretary Chnong, ki dkhot ka Executive Dorbar wa ki bru stat bru chemphang wa em i kitkhlieh ya i chngaaiñ i manbru longbru ha tawiar ka Myntdu wei ya kani ka dorbar u khut kyrpang ha ka 17-02-24.
Chooh chooh ha kani ka yalang da rai leh wow khut, kyrsu kyntu ya kiwon kiwon kiwa chong chnong kiwa em sakhiat i kitkhlieh yow chngaaiñ ka Myntdu wow psiah ki kam ki dkhot wei wow yakrehlang waka Khooid Ya Ka Wah Myntdu.
Discussion about this post