Jowai: Kam wa da tiplang wa ka Bamphalar toh kawi na ki rukom-dustur wa yoh u yoo, u sakhi hapoh ka chnong Jowai ha ki kattu katni tylli ki dong, kamtæ ha kani ka tayaw ka Loomkyrwiang kam chibynta wow pyndep ya kani ka rukom-dustur da pynman ko i lehke drama wa chimiet wei i yabaamdoh sñiawbha ha Yungwalieh ha ka sngi wabood.
Ya kani ka Baamphalar hapoh ka Loomkyrwiang da pait da pynlai da ka Khynroo-Khyllood Commmittee heiwa ka sngi Muchai 1 tarik da em i lehke drama da ka parom wa e pyrtuid “Chyer Changprah” katwa ha ka sngi wabood wan Pyngkat 2 tarik da em i yabaamdoh sñiawbha ha Yungwalieh hapyrdi i chimbyntalang ki khon ka dong ka chnat kamjooh ki lok ki jor.
Ha uni u snem ya kani ka Bamphalar yong ka Loomkyrwiang da wan wow wai ya ka da u Wailadmiki Shylla, MLA heiwa chwa wow yoh u yoo u sakhi ya ka parom yong ka drama da em chwa ka yalang yahkhmat wada pynlai da ka Chongknor yong ka Seiñ Kynthai, ka Dengsuk Laloo heiwa ha kani ka yalang da yoh u ap u sñiaw yei klam i batai na ki waheh wasian ka dong kiwa kynthup ya u Chibor Najiar, u Hamewan Laloo wa u Lammat-O Laloo katwa yei kyntien khublei won da e da ka Secretary Seiñ Kynthai ka Kongka Chullai.
U Wailadmiki kam u kongsan yong kani ka janmiet hei e ya ki kyntien da yaroh u ya ki waheh wasian wa ya ki khon khynroo khyllood ka dong kiwa da kitkhia hei wow pynman ya kani ka rukom-dustur na ki por cha ki por wei da kyrsu kyntu u leh wa emkaam wow nang pynmiat pynjanai ya kani ka rukom-dustur chooh chooh leh da ong ya ki lok ki jor wa wa wan sakhi ya kani ka lehke drama wow e bor e mynsien ki ya ki wa yachimbynta.
Khaddooh chwa wow pynkut yei klam da ong u kam wa da pynchet ha oo ya ka lyngkor wow pait yei miat i bha ka imlang sahlang hapoh ka Constituency, da kular u wow yakrehlang u thooh ki laad ki luti hei wow pynbiang pyntoh yei duna, tymbuiñ iwa ka dong ka chnat dang dawa ko u leh u pyndep.
Discussion about this post