Ki MLA ka Congress kiwa da lai wow chimbynta ha ka yalang yong ka Committee wa da thung da ka sorkar hajrong ka Reservation Roster wa Reservation Policy, da e yumut cha ka Committee wow em noh da ka Expert Committee yow bichaar yei e yumut yong ki seiñ saiñpyrthai hajrong i pynkylla thymme ya ka aiñ bhah kreh namo ka State Job Reservation Policy.
Hawa klam hadien ka yalang, u MLA na Mylliem uwa man leh uwa yahkhmat ka Congress Legislature Party (CLP), u Ronnie V Lyngdoh da ong u wa ka Party ka sñiaw ko wa da emkaam wow pait bniah biang ya ka Reservation Policy neibhah wa da man ko ka aiñ kawa da rim hadooh 51 snem.
Da pyntip wa neiliang ka Congress daw phah e yumut cha ka sorkar ha kini ki ar tayaaw wow wan hadien wa ka Party da yasyllok wa ki bru kiwa tip ya ka aiñ.
Da ong u wa neiliang ki MLA ka Congress da lai ki wow ya chimbynta wei da e yumut ki wow chna ya ka Expert Committee, wei ha katai ka Committee toh u em ki bru wa chemphang nadooh kiwa tip yei long i man ki thaw wa i boon bru, kiwa tip ya ki riti synchaar, kiwa tip ya ki aiñ wei kamjooh kiwa tip ya ka yoh ka kot.
Hawa kylli hajrong i ong u MLA ka Party na Gambegre, u Saleng A Sangma wow e bait 80% cha ki Khasi, Jaiñtia wa Garo, neiliang u Ronnie da ong u wa kam u MLA em u yei hok wow pynsñiaw yeiyi wa em ki u ong, tangwa kam ka Party won ka sñiaw emkaam ko wow ya phyllu wow yatai wei ya ka rai wa khaddooh u chim bait kam ka Party.
