Ki waheh chnong ka thaaiñ Iooksi-Saphai, hadien wa da yoo yei pynmih khubor da ka Synjuk Ki Waheh Chnong Ri Jaintia heiwa da dawa ka bhah 20% ya ki Jaiñtia hapoh ka Reservation Policy, kamtæ da ong wa ki ym embynta ki ha ini i dawa katai ka synjuk, wei ki kwah ki wow pynche yow klam che wa ki waheh chnong ka thaaiñ Iooksi-Saphai kyrchaan pura ki ya u Ardent M Basaiawmoit yei dawa pynthymme namo wow Review ya ka Reservation Policy hapoh ka jylla Meghalaya.
Da ong wa ini ymtoh de i por wow sñiaw yaphær thaaiñ næ wow sñiaw yaphær jaitbru, tangwa toh i por wow yatylli neibynta wow yakhun yei eh i khoo ka jaitbru.
Kamtæ da ong wa i pyrtuid Jaiñtia ymtoh i pyrtuid jaitbru tangwa i pyrtuid ka thaaiñ wei toh u sñiawthooh leh wa ha Jaiñtia da kynthup lang ya waroh kiwi won ki jaitbru kam ki Biate, ki Karbi wa kiwi kiwi wei ym ye wow kyntait la kammon kammon leh wa ki toh ki nong Jaiñtia wa pura.
Da ong leh wa da maad yei chah tympra ha ki por ka sorkar pharæng kiwa da pynemkaam da ka Divide and Rule Policy yow tympiah ya ka jaitbru. Tangwa i thmu yong ki pharæng ym ye ki wow pynpra ya ka jaitbru neibhah wa em ka kheiñ kur kawa skem wei kawa em yurim neibhah ki pharæng ym ye ki wow pynkhlaad yei yatoh kur ki Challam na Pnar, ki Shabong na Khynriam wa ki Mukhim na War, neitæ ki Laloo na Pnar, ki Lamin na War wa ki Diengdoh na Khynriam leh dang man ki chi kur wei boon kiwi ki kur kiwa na kylleiñ ki thaaiñ ka Bri U Ynñiawtrep kiwa dang toh chi kur.
Ym jooh em leh ki kur ki jait na ki jaitbru Biate kiwa da chong da sah ha Jaiñtia Hills kiwa dang yatoh chi kur wa ki Pnar wei kamjooh leh ym jooh em ki kur naka jaitbru Karbi kiwa dang yatoh chi kur wa ki Bhoi hanla sah mynkna ki hapoh ka Ri Bhoi District.
Kamtæ kam ka jaitbru ymtoh wow pdiang yei chah tympra ha kiwi ki ar kiwa thmu wow pynyaphær hapyrdi ka jaitbru.
Khaddooh khatwai ki waheh chnong ka thaaiñ Iooksi-Saphai da kitbok kitrwiang ki leh ya u Ardent Miller Basaiawmoit wow nang yoh u ya u yei doh i pran wa chait wa khlan wei kamjooh leh ya waroh ki paidbah ka Bri U Ynñiawtrep hi, wei kyrmen wa ini i dawa yong ka jaitbru daw mankaam ko khlem pep chisien chi sngi.
Ka Wyrta na u Nangaibormi Sutnga (Waheh Chnong Umdeinlin Iooksi), u Leonard Rabon (Waheh Chnong Iooksi Kyanmynsar), u Gino Synnah (Waheh Chnong Saphai), u Clement Pala (Waheh Chnong Iawthymmei), u Watsing Papeng (Waheh Chnong Nongryngkoh), u Chesnal Manar (Waheh Chnong Pohkseh), u Siworning Sayoo (Waheh Chnong Madanrwai), u Histokrist Pachiang (Waheh Chnong Iooksi-Iapkhla), u Kyrshan Chullet (Waheh Chnong Priang Iooksi), u Deilang Wahlang (Waheh Chnong Sarhen) wa u Hamran Lyngdoh (Waheh Chnong Iooksi Tongkiad).
