Jowai: Arphaw tylli ki skur, chiphaw tylli na nongkyndong wa chiphaw tylli na sor kiwa em hapoh ka West Jaiñtia Hills, ynne ka 11 tarik da wan chimbynta ki ha ka District Science Exhibition wa pynman da ka Office of the District School Education Officer & District Project Coordinator, RMSA West Jaiñtia Hills District.
Ka phang ha kani ka Science Exhibition ha uni u snem toh “Science & Technology for Nation Building.” I thmu wa kongsan kani ka Exhibition toh wow e laad ya ki khynnah skur yow pynyoo ya i stat sayan yong ki yow yarap yeiwa boon i eh wa ki jait bru ha ka pyrthai katni chem ki nadooh i duna um, i pynsih u bru ya ka rymaw, i boon ki jhep, i sah kari, i kjut i sam wa kiwi kiwi.
U kongsan ha kani ka sngi uwa wan wai leh ya kani ka Science Exhibition toh u R. Rapthap, DC WJH uwa pynkynmoo ya ki khynnah wa i stat sayan toh i kyrkhu wa khroo bha ya ka jaitbru wei lada ym em ko, ka pyrthai daw neh ko hei doom wa i biej. Ka sayan da pyllait ko ya i yap khlam da yada ko leh na ki jait kjut wa boon jait.
Kamtæ da pynkynmoo u ya ki khynnah wa ka mynried toh ka yong ki wei yei stat toh u saam ya ki cha ka pyrthai ymtoh u murieh ki wei ym toh u sarom ki u kylli ya iwon iwon wa ym sñiawthooh ki.
Ki khynnah ha kani ka sngi da pynyoo ki wa kammon u pyllang ya ka um slap yow lait na i duna um, kammon wow yada ya ki hali ki pynthor, u pynemkaam ya i bor ka la-ær wow pynmih bordiñ, ki pliang ki khuri wa chna da ki sla ki siej ki wym ktah ya ka rymaw, u chna da ka Fly Over ha Iawmusaing yow pynduna yei sah ki kari ha Jowai wa kiwi kiwi de.
Ya kiwa jop daw pynbna mystep ka sngi ha ka yalang pynhiar pyrda ya kani ka District Science Exhibition wa pynman ha St. Mary Mazzarello Girls’ Higher Secondary School, Jowai.
Discussion about this post