Ka Kiang Nangbah Stadium toh kawi na ki madan yalehke ha Ri-loom Jaiñtia kawa da rim bha tangwa iwi na i duna ha kani ka thaw toh i wym em ka paikhana paidbah (Public Toilet) tangwa ini da man i iwa rim heiwa ynne ka sngi da wai ya u mooyurim neibynta kani ka paikhana paidbah ha kani ka madan.
Ha ka yalang booh mooyurim da emlang u MLA ka Jowai uwa da man kam u kongsan deiwa emlang kiwa kitkaam ka West Jaiñtia District Sports Association (WJDSA) wa kiwa kitkaam ka Rotary Club of Jowai.
Ha kani ka sngi ya ka yalang da pynlai da u Rtn. Montre Passah uwa man u President ka Rotary Club Jowai heiwa da yoh ya i klam na u Rtn. SK Lato uwa jooh man kam u President warim ka Rotary Club Jowai heiwa da kdaw u wa napoh Ri-loom Jaiñtia da pynmih ko chiboon ki khloor yalehke ka jylla wei da kyrmen u wa sam neini chaphrang daw ye u pynmih ya ki khloor yalehke deiwa em i yakrehlang waroh.
Neiliang u Wailadmiki Shylla hawa e i klam kam u kongsan da e yaroh u ya ka Rotary Club kamjooh ka WJDSA hajrong ki kaam wa bha wa da leh ki neipor cheipor neibynta i bha i miat ki paidbah.
Najrong wa kular u wow rah yeiwa emkaam kani ka madan haphrang ka sorkar, da kular u leh wow e yarap T. 10 lak lyngba ka 15th Finance cha ka WJDSA neibynta ki kreh yong ka.
Kiwi kiwa klam ha kani ka sngi toh u EMH Passah uwa man u Working President ka WJDSA, u Nangeibormi Suting uwa da e ya ki kyntien khublei wa kiwi kiwi.
