Ynnin ka sngi da pynman ua ka yalehbol hapyrdi ka dhab ki Pastor pyrchah ka Police Department EJHD ha madanbol ka chnong Musniang. Kani ka yalehbol sñiawbha toh kam chibynta wow pynsñiaw yei pyrchah ya i dih pynmuaid khamtam i drugs, heiwa ka phang pyrdi yong ka man ko “Jied yei rukom im khlem i drugs wa khlem i kiad”.
Chwa wow sdang ka yalehke da em chwa ka pynsñiawthooh namo ka Awareness Campaign ya kawa da pynlai da u Rev. D. Malang, da yoh ya i klam hajrong kani ka phang na u Banraplang Jyrwa uwa man u Addl. S.P. ka EJH, u Rev. L.O. Garod uwa man u In-charge ka Industrial Ministry, u Serious Dkhar, Statistician na Ephphatha Society, u Tbn. P. Bareh uwa man u Waheh Chnong, wei da pynkut ya ka pynsñiawthooh da i duwai na u Tbn. M. Dkhar.
Ha ka yalehke ki Pulit da jop ki ya ki Pastor da 5-1 heiwa ya ka kool na ki Pastor da thap da u Rev. E.S. Sapuh.
Iwa sñiawphylla wei sñiawsuk ha kani ka yalehke toh katwa kini ki arliang dang yalehke ki, ki paidbah wa chong chnong da wan e sñiawbha ki da ka Poisa cha ki Pastor. Kamtæ hadien wa da kut ka yalehbol ki Pastor da pynbait ki wa ka poisa waroh wa da yoh ki na ki paidbah u lai e yarap ki ka cha ka thaw ri khynnah (Children’s Home) ka Synod Mihngi kawa em ha Wahiajer.
Neiliang ki Pastor da e khublei kyrpang ki ya ki khon ka chnong ya i maya wa i sbun mynsien yong ki.
