Ka Joint Action Committee Against Casino da rai ko wow mih da ka Rally paidbah nadooh Ri-Bhoi District chadooh ka yung krehlaam u Montri Rangbah næ ka Secretariat ha Shillong. Ya kani ka rai ka JAC da chim hadien ka yalang wa man ynne ka sngi.
U Pynwanbor Sylliang uwa man u Secretary ka Synjuk ki Rangbah Shnong Ri-Bhoi da ong u wa ka JAC da rai ko wow yachem ya u CEM ka KHADC wow e ya ka dorkhat wei wow kyntu ya ka KHADC wa ymtoh u e Trading License wow pynlai ya ki kaam yakhle.
Neiliang u President ka KSU North Khasi Hills, u Ferdinald Kharkamni da ong u wa ka JAC da rai ko wow dawa bait na u Montri Rangbah wow pyndam ya i thmu wow booh ya ka ktem yakhle (Casino) ha Ri-Bhoi.
Da ong u leh wa ka JAC dawa ko leh na ka sorkar wow pyndam ya ka Meghalaya Regulation of Gaming Act, 2021, neibhah katwa dang em kani ka aiñ pynyoo i wa ha iwon iwon i por ka sorkar daw pyrchang ko wow booh biang ya ka ktem yakhle.
Ha kani ka yalang da wan chimbynta lang da u Mayralborn Syiem, MLA ka Nongpoh, u George Lyngdoh, MLA ka Umroi, u Sosthenes Sohtun, MLA ka Jirang, u Balajied Rani, MDC ka Nongpoh, u BB Makdoh, Chairman ka JACAC uwa man leh u Chairman ka Synjuk Ki Rangbah Shnong wa kiwi kiwi.
