Ka India Meteorological Department, Meteorological Centre, Shillong da pyntip ko wa daw em ka la’ær wa joor hadooh 60 Km/h deilang wa u slap uwa daw sdang nadooh ka 26 tarik uni u bnai ha ki kattu katni ki thaw Meghalaya wa kynthup ya ka East wa West Jaiñtia Hills District wei daw joor bha ha 27 wa tarik 28 tarik heiwa neibynta ka 27 tarik da booh da ka Red Alert neibynta ka East Khasi Hills, West Jaiñtia Hills wa East Jaiñtia Hills katwa ha ka 28 tarik won da ka Orange Alert wei u slap uwa daw tlot bor ye u wow hiar hadooh ka 29 tarik.
Ini toh neidaw wa em ka Cyclonic Storm ‘Remal’ kawa da wan na Bay of Bengal wei daw wanrah ko chiboon u slap wei kamwa man kattæ daw hiar khyndaw ko heipor pyrdi synyaaw ka 26 tarik ha West Bengal wei i bor kani ka Cyclone daw poi i leh cha Meghalaya.
Neiliang ka sorkar da kyrpaad ko ya ki paidbah wow man kiwa da pynkhreh wei wym toh u mih u lai ha kini ki por lym toh iwa emkaam wei wow pyntikna wa ki Mobile Phone toh kiwa dap Battery yow yoh ki ya ki khubor SMS yow pyntip lada jia iwon iwon.
U DC ka East Jaiñtia Hills da pyntip u wa da pynkhreh chwa ki tylle, ki Tube, ki Life Jacket, ki pyrthap, ki JCB, ki kor ah dieñ wa kiwi kiwi lada jia iyi iyi.
Da pynkhreh leh ki Number wa ye ki bru u Phone lada emkaam yarap ki:
1. District Disaster Help Line Number: 1077/ 03655295142
2. District Disaster Management Officer : 9774124321
3. Block Development Officer, Wapung C&RD Block: 7005877634
4. Block Development Officer, Lumshnong C&RD Block: 8794255590
5. Block Development Officer, Saipung C&RD Block: 9612106744
Discussion about this post