Jowai: Ka seiñ Border People Development Organization (BPDO) ryngkat wei yakrehlang wa ka yungkrehkaam ka Nehru Yuva Kendra, Jowai da pynman ko ya ka Seminar wa chi sngi hajrong ka phang wa kordor i stat i tip.
Ya kani ka Seminar da pynman ynnin ka 14 tarik ha chnong Namdong – A, heiwa da wan chim bynta da kiwa chong chnong nadooh ki manpa manbei wa ki khynnah skur yong ka chnong na ka Government LP School wa na ka Mynktieh SSA LP School Namdong – A.
Ya kani ka yalang da pyllai da u B. Kyndait, wei ha chwa ini da em i lehke wa tbian wa da pynkhreh da ki dkhot ka BPDO hajrong ka phang.
Da yoh ya ki kyntien pdiang burom na u D. Lyngdoh, National Youth Volunteer ka NYK Jowai, da yoh i klam hajrong ka phang na u D. Dhar wa ka R. Tariang kiwa man kam kiwa sikai yong ka Govt. L P School Namdong.
Ka Tariang hawa e i klam da e nongmuna ko wa kammon ka imlang sahlang ku ko deiwa em ki bru kiwa stat wei da kyntu ko ya ki khynnah wym hoi u pep skur ki cheiteiñ por wei wow pynemkaam hok yei por ha i puræ puthi.
Neiliang u Dhar won da kyntu u ya ki manbei manpa wow man ki kiwa kitkhlieh neibynta wow pyrchah ki yei pep skur ki khon ki chiteiñ por khamtam ha ki thaiñ nongkyndong heiwa boonsien ki khynnah haap mylla næ kreh chitom ki heithaw wow khreh ki ya ka kot, deiwa ong leh wa emkaam u e yarap ki timun tidiang ya ki khon yong ki.
Hadien ini da yoh yei klam na u R. Thubru uwa da batai hajrong ka sngi kyrpang ki khynnah skur namo kawa tip leh kam ka Childrens Day.
Chwa wow kut da yoh ya ki kyntien e khublei na u J. Shylla.
Discussion about this post