Jowai : Ka Seiñraij Jowai ynne ka sngi da leh warom ko ya lyngkhooh dap 154 snem wa chah pasi U Woh Kiang Nangbah deiwa sdang chwa da i booh syntu ha u mot sahkynmoo wa em ha Loom Mooliksoo iwa man leh i thaw wa pyndep ya ka niam ka rukom wa khaddooh yong oo.
Hadien ini won da thang ya ki mombati kam ka dak burom ya u Woh Kiang Nangbah.
Ha ka yalang wa pynman ha Mynkoipyrdi, Loompyrdi Iongpiah da pyntip u O.R. Challam u president ka Seiñraij wa ha uni snem daw leh ya ka siang ka pha ya u Woh Kiang Nangbah ka wow leh da ka kur Syngkon kawa man leh ka jooh ka yung blai wa ka kur Nangbah.
Da yooluti u wa hadien wa leh ya ini daw mihsalan da uwi u Kiang Nangbah wow yaleh pyrchah yei sih ka pyrthai wa katni.
Yei parom yong u Woh Kiang Nangbah da khana da u Dawmanchuh Lamar, EM, SRJ uwa ong wa da boon kiwa leh ki pharæng nadooh wa wan nyngkong ki ha Jowai ha u snem 1843 heiwa da pynhaap ki ya ki khloo ki kjam khlem yoh bor na ka chnong yow chna luti, chna thanat kiwa chna ha ki thaw wa kyntang.
Da pyntip u leh wa ki pharæng da tba kti ya ki kynthai heipor wa chna ki ya u sarok na Jaiñtiapur hadooh Naogaon.
Da pyndam ki ya i chaad Pastieh ha Ialong, da pyndam ki ya ki Dolloi ki wym bien u krehlang wa ki.
I khaddoh wa pynman yow Woh Kiang Nangbah wow rai u yieñ pyrchah ya ki phareng hadien wa pynbna ki wow haap su khajna iwi pa iwi i yung (House Tax) wei ya ki wym su daw dai ki ya ki tiar ki tar yong ki.
I nynkong dooh u Kiang Nangbah wa ki paid u leh ki toh wow hiar ki cha ka thanat ki pulit ha Jwai wei da thang ki ya ka wei da chim ki leh ya ki suloi yong ki pharæng.
Ha kani ka sngi u Y. Tsering, Additional Chief Secretary ka jylla uwa man leh kam u kongsan ha kani ka sngi da ong u wa u Kiang Nangbah, i leh u toh ryngkat i wa u Bhagat Singh tangwa neidaw wa mih u na i bynta ka ri wa jngai na Delhi tæ duna ki bru wa tipmit ya oo.
Kamtæ da kyntu u ya ka Seiñraij yow pynbiang ya ki kot ki sla chaphang u Kiang Nangbah yow tipmit ka ri wa ka pyrthai ya oo.
Da pyndep ya ka yalang da ka Siang ka Pha ya u Woh Kiang Nangbah ha u loom Mooliksoo.
Discussion about this post