Ka mukotduma PIL wa da yaleh da ka Synjuk Ki Waheh Chnong Jowai ha ka Meghalaya High Court da chong bichaar biang ya ka ynne ka sngi heiwa ka sorkar da wanrah ko leh ya ka bui (Report) heiyatoh wa i jhep wa da lang ym du ha Jowai wei ha Khliehriat leh kamjooh.
Ha kani ka Report da khana yei thong wow chna ya ka Compost Plant wei daw chna leh ya ka Solid Waste Processing & Disposal Plant kawa embor 10 Ton chi sngi hei lut wa T. 13.37 klur kawa daw em ha Khliehriat wei kini daw man ki neibynta ka chnong Jowai waka Khliehriat.
Da khana leh wa da pynmih ya ka Expression of Interest (EOI) wei yeini waroh daw pyndep hawa sdang u Naichiphaw 2022. Da booh por leh 15 sngi yow pynbiang ya ki kot ki sla kiwa kwah u chna ya kani ka thaw wa sa 15 sngi wow wan thap poisa Security Deposit wei wow ya soi soskular.
Kamtæ hawa kut ka tayaw wa nyngkong u Khonchonglad (Nov) 2022 lada lai bait ini i thmu ka sorkar daw pyndep lut ya waroh iwa emkaam wei daw pyndep u chna ya kani ka Plant hapoh 12 bnai.
Hajrong ini, ka yung bichaar da ong ko wa daw yang hadooh u Khonchonglad (Nov) 2022 yow pait kammon da leh ya kiwa emkaam yow ye u sdang noh u chna ya kani ka Plant kawa da toh u man kawa da hoi u krehkaam hawa kut u Khonchonglad (Nov) 2023.
Ya kani ka mukotduma daw chong bichaar biang ha ka 07-11-22.
