Ka chnong Bataw kawa em hapoh Wapung Block yong ka East Jaiñtia Hills District, ynnin ka sngi kam chibynta ka sngikha u Mahatma Gandhi da mih ko chakhmat wow pynkhooid ya ka chnong ha ki bynta waphær waphær.
Ha ini, da chimbynta da ki 9 tylli ki Dong kiwa em hapoh ka chnong heiwa ki paidbah da mih ki chakhmat hapoh i yahkhmat ki heh Dong yong ki deiwa pynkhooid nadooh ki luti wow lai cha ki umbaam umdih, ki bynta ki rood ki kiar yong u sarok, ki luti lai-kjat wa kiwi de.
Yeini i pynkhooid da pait da ki dkhot wa da thung neiliang ka chnong kam ki Inspection Member hapoh i yahkhmat u Waheh Chnong, u Deihok Sumer, kiwa da lai wow sakhi ya ki Dong heiwa da chem yei mynsien wa maya kiwa chong chnong wow mih chakhmat wow kheiñkor yei khooid deiwa bood yei emkaam u pynneh yei lehkhooid wei wym hoi u noh Plastic heiwa da pynkhreh leh da ki thaw noh jhep næ Dustbin.
U Deihok Sumer hei sakhilang kiwa kitkaam na ki chnat waphær waphær kam ka VDP wa da mihkhmat da u Jowel Lyngdoh, President kamjooh u President ka BYWSC, u Martin Lyngdoh, ka Chairman ka VEC, ka Marioki Lakhi hawa e yei klam ha ka yalang wa tbian wa da pynman ha Dorbar Hall yong ka chnong da ban joor u wa i yatylli lane i yakrehlang sdang i leh da kiwa chong chnong yow tip ki wow leh khooid hapoh chnong poh thaw.
Ha kani ka yalang ya phyllu yumut da wan wow ya sakhilang da u Firstborn Nongtdu uwa na Khliehriat West kam u Resource Person hei ya synraan lang u Leaderone Nongtdu na ka Khliehriat West uwa man kam u Advocate.
Hawa e yei sneiñ yei kyntu ya kiwa kitkaam yong ki dong waphær waphær, u Leaderone Nongtdu da ong u wa i lehkhooid man iwa hakhmat dooh iwa ye u rah leh yei naam yei burom yong ka chnong, neiliang u Firstborn Nongtdu da batai bniah u chaphang kammon u pynlang yei jhep iwa ye leh wow dai yow yoh poisa ka chnong wei yooluti u ka chnong Bataw u man ko leh kam ka Model Village hapoh ka Wapung Block dei ya krehlang ki paidbah.
Hadien ka yalang da yoh u saam cha ki dong wa da ye u leh bha ha i pynkhooid chnong heiwa ya ki 1st Prize da yoh ka Dong Border wa ka Dong Umtlooh heiwa da yoh ki ya ka khusnam Rs. 3000 kawi kawi ka dong, ya ka 2nd Prize da yoh da ka Dong Knia-Murit kawa da yoh Rs. 2000 wei ya ki 3rd Prize da yoh da ki ar tylli ki Dong kitæ toh ka Dong Lyngken Suwe wa ka Dong Umstyndong kiwa da yoh ka song poisa kawa Rs.1000.
Da saam leh ya ki Consolation Prize cha kiwi tawon ki Dong kamwa 4 tylli deiwa e Rs. 500 kawi kawi ka Dong.
Discussion about this post