Ka sorkar Meghalaya da e buskit ko cha ki 8 ngut ki sahep pulit wa ki langrut ka Anti-Narcotics Task Force (ANTF) kiwa da pynyoo yei pnah wow kem wei khyndang drugs khamtam yeiwa dang jia ini wadep ha East Jaiñtia Hills.
Kam wow pynkynmoo wa ini wadep, ki pulit ka ANTF East Jaiñtia da yoh ki wow kem drugs wa chongdor Rs. 4 klur.
U Montri ka chnat Social Welfare, u Paul Lyngdoh da pynkup burom wei da e buskit u da ka poisa wa ka Certificate cha ki pulit ka ANTF ha ka yalang wa da pynman ha yung krehkaam ka ANTF ha Golflink, Shillong ynne ka sngi.
Hawa klam ha kani ka e burom ya ki pulit ANTF, u Paul da ong u wa kani toh ka moomær wa pynyoo yei biang i kreh ki pulit wow yoh kem palat Rs. 4 klur i drugs chisien kem.
U Montri da yaroh u wa dei lyngba i kreh chitom ki pulit kiwa dooh thiah dooh dem, da ye wow pyntkut ya u kynjri hapyrdi kiwa thied wa kiwa khayi drugs khamtam wa ka Meghalaya toh kawa lai luti pateiñ cha kiwi ki jylla.
Hawa kynthah ya kitu kiwa myllien wow klam dait deiwa suk nei thaw wa chong, u Paul da ong u wow sñiawbha u e buit cha ka sorkar wow yakhun yei eh, ym wow kut miet du hei wow kdaw kti.
Ha kani ka yalang da emlang u DREAMS Mission Director, u Francis Kharshiing, u DIG (CID), u Jubi G Momin wa u SP ka ANTF, u Giri Prasad.
Discussion about this post