Da ka song poisa yoh kiwa jop hei pynlang Plastic hapoh ka chnong Lumputhoi

Ka Dorbar Chnong Lumputhoi chirup wa ka VWSC kamwa jooh leh man-u-snem, ha ka 2 tarik da leh warom ko ya ka Gandhi Jayanti deiwa ya mih paidbah wow pynkhooid ya ka chnong ka thaw waroh kawi wei wow e khusnaam cha kiwa jop ha ka yakob pynlang Plastic.

Ka thong yong ka dorbar chnong chirup wa ka VWSC wow phah pynlang Plastic chisnem chisnem ya waroh ki manyung wa em ha ka chnong toh yow man ka chnong ka thaw kawa khooid wa suba khamtam ya ki soodong sookun ka Bei Rymaw.

Hadien wa dep pynkhooid ya ka chnong ka thaw da wanrah kiwa chong chnong jar jiar ki Plastic wa dadep pynlang cha ka Community Hall wei chwa poi chei wow thaw kilo ya ki Plastic, da em chwa da ka pynsñiawthooh paidbah heiyatoh wa i khooid i jngiar ym du ha yung ha sem, ki surok, ki luti syngkieñ, ki thaw sait that tangwa wot ya ka umbaam umdih khamtam wa emkaam u lehkhooid bha ya ki.

Ha kani ka pynsñiawthooh paidbah da yoh yei klam pynsñiawthooh wa ki buit ki budia wa kammon u leh yow ye u pynduna yei jhep kiwa mih na yung na sem, khamtam ki jhep kiwa ye u pyut wa ki wym pyut iwa da e na u General Secretary Chnong kamjooh da pynrap chooh chooh da i klam na u Secretary ka VWSC.

Related posts

Yap uwi wei mynsoo le ngut hadieñ wa iñ i yung dukan ha Fancy Bazar, Guwahati

October 3, 2025

Dawa ka KSU wow pyndooh yei pyrtuid ka dkhar wa yoh u lai puræ MBBS na ka State Quota

October 2, 2025

Ya kani yakob pynlang Plastic da yahkhmat nyngkong da u General Secretary Chnong ha u snem 2021 wei da man ko leh ka yakob ka san (5th Plastic Collection Competition) wei na ki 136 tylli ki manyung wa em ha chnong kiwa da pynpoi jar jiar ki Plastic, manda thaw khia kyllum ya waroh dapoi 347 kilo.

Hadien wa pynwai ya ka yalang da saam ya ka song poisa cha kiwa jop kiwa man kamni ha wah:

1st Prize da yoh da ka Biew Lyngdoh kawa pynlang 35 kilo ki Plastic.

2nd Prize da yoh da ka Seiñlang Lyngdoh kawa da pynlang 30 kilo ki Plastic.

3rd Prize da yoh da ka Rita Lyngdoh kawa da pynlang 15 kilo ki Plastic.

Najrong ini da saam leh hadooh 10 tylli ki Consolation Prize.

Ka Dorbar Chnong Lumputhoi da pynkynmoo ko leh ya waroh ki bru paidbah kiwa wan na ki chnong wapher wapher khamtam kiwa kamai kari wym chah u noh khiar ki yei jhep, ki Plastic, ki snieh kot wa kiwi kiwi kiwa ye u pynjakhlia ya ki luti syngkieñ wei ya ka chnong ka thaw hi waroh kawi. Lada jia wa chem ya kiwa tyngkheiñ yeini, ka dorbar chnong u pynchitom ko katkam ki aiñ ka chnong.

Da kyrpaad leh ya waroh u sñiawbha phi u ya krehlang wa ka chnong khnang wa iwa mut wa thmu yong ka chnong yow man i iwa jop.