Uwi na ki khloor yalehke Sports ka Ri-loom Jaiñtia, u ma Sunday Morning Tariang daw pynkup burom ya oo da u Montri Rangbah ka jylla u Conrad Sangma da ka Sports Person of the Month Award haka 11 tarik uni u bnai ha State Convention Centre, Shillong.
Ka sorkar da jied ko ya u ma Sunday deiwa ong wa oo man u kam ka nongmuna wa tyrchaaiñ ha ki jait yalehke wa boon jait wei kamjooh i naam wa da yoh u da e mynsien ko leh ya kiwi.
U ma Sunday toh uwa da pawnaam ha ka yalehke Football, Badminton, Table Tennis wa kiwi kiwi wei haka Football da jooh mihkhmat u leh ya ka Meghalaya man i por hadooh wa da yoh u leh wow man kam u Captain ka Meghalaya.
Ha ka Badminton leh da yoh u wow chimbynta haki yakob ka National Level wei hadooh katni leh dang chimbynta u ha ki Tournament wa jooh pynman khamtam ha Jowai.
