Jowai: U khloor yalehke Kickboxing na ka Ri-loom Jaiñtia, u Hameshaniah Suiam ynne ka sngi sa chisien da wanrah naam biang u ya ka ri wa ka jaitbru deiwa yoh u ya ka takma ksiar ynne ka sngi ha ka lympung WAKO World Cup Diamond Kickboxing 2019, ha Russia.
Ynne ka sngi u Haneshaniah ha ka final yong ka kyrdan yakhun 57 Kg–Point Fight Event da pynrem u ya uwa na Iraq, u Nus Hassan Imad Haear deiwa yoh ya ka Score 21/12.
Ka yakhun u Hameshaniah ympu em kut ko ha kani ka lympung heiwa mynstep daw yakhun won u sa ha ka kyrdan Kick Light-57 kg Senior Men.
Kani ka lympung toh kawa sdang nadooh ka 24 tarik hadooh 29 tarik ha Anapa, Russia wei da pynman ya ka da ka World Association of Kickboxing Organization chirup wa ka World Anti Doping Agency (WADA), ka Peace & Sports, FISU & International Fair Play Organization wa pynman da ka International Olympic Committee (IOC).
Heijooh i por neiliang u Wyrta daw pyntip i chaphi heiyatoh wa kani ka lympung deiwa kitbok ya u Hameshaniah wow man u uwa tyrchaaiñ ha ka.
Discussion about this post