Da ka Thar u pynkhle ka EJDCA hajrong ka thong wow pyn ka-it yei yaleh Cricket wei yow lait nei drugs

Ka East Jaiñtia District Cricket Association (EJDCA) kawi na ki seiñ wa kreh monsñiawbha, ynne ka sngi da pynman ko ya ka yalang ha Eastside Inn, Ladrymbai wow pynlait paidbah ya ki Ticket khle nasib yong ka khnang wow pynku ya ka yarong poisa ka seiñ.

Ha kani ka sngi u Addl. SP ka District, u Banraplang Jyrwa da man u kam u kongsan heiwa ya ka yalang da pynlai da u Vice President ka seiñ u Mehiwot Shadap.

U General Secretary ka seiñ, u Tnebha Phawa da e khublei u ya u Addl. SP ka District wa da pynlait por wow wan cha kani ka sngi yow ye u pynlait ya kini ki Ticket ya kiwa daw pynkhle ha ka Fete ka seiñ.

Da ong u wa i thmu wow pynman ya kani ka Fete toh wa hadien wa yoh u pyndap yeiwa emkaam ha ka madan ka seiñ wa da chim wai hadooh lephaw snem ha Mukhep neibhah ka seiñ da lai yakhun ko ha ki lympung yalehke ha ka jylla wa har rukom. 

Related posts

Khut sñiawbha ka Marianhill Higher Secondary School cha ka Fete kawa ar sngi

November 13, 2024

Da khut ya ki kynthai wa em 17 snem chaneiñ wow chimbynta ha ka 1st Miss Latuber Beauty Contest 2024

November 12, 2024

Heijooh i por da ong u wa i em ka seiñ toh wow yakhun pyrchah ya i drugs deiwa riñ ya ki khynroo cha kani ka yalehke Cricket khnang wow lait ki nei drugs.

Chooh chooh da ong u wa ka seiñ angnood ko wow pynku ya kani ka jait yalehke wow yoh kreh ki deiwa e nongmuna ya u Kishan Lyngdoh na Sohkymphor uwa da yalehke na ka jylla heiwa da yoh u ym duna Rs. 20 lak chi snem ha ka lympung Ranji Trophy.

U Banraplang Jyrwa kam u kongsan da ngait skem u wa i thmu ka seiñ wow pynman ya ka Fete yow pynku ya ka yalehke Cricket toh iwa emkaam neibhah boon toh kiwa yalehbol ha ka District.

Da kular u leh wa neiliang ki pulit ka District leh u yarap ki u dai ya ki Ticket ka khle nasib. 

Heijooh i por da ong u wa katni pynjoor ki pulit wow yakhun ya i drugs wei ini i thmu daw ye u riñ ya ki khynroo wow yalehke Cricket ki khnang wow lait ki na ki kaam wa sih.

Da kitbok u leh wa ini i thmu ka seiñ u man iwa jop.

Ya kini ki Ticket u pynkhle ha ka 24 wa 25 tarik u Khonchonglad (Nov), 2023 kawa man ka sngi wow pynman ya ka Fete ka seiñ.

Ya ki kyntien da e khublei da yoh na u President ka seiñ, u Rajeev Lyngdoh.

Ki Prize yong ka khle nasib man ki kamni ha wah: 

1^st Prize- Thar Top Model (Diesel). 

2^nd Prize- Rs. 1,00,000

3^rd Prize- Rs. 50,000 

Da em leh ki Consolation Prize 5 tylli kiwa Rs. 10,000 kawi.