I leh khalær kiwa kreh ka 100-Bedded Maternity and Child Hospital (MCH) kawa em ha Panaliar, Jowai heiyatoh wa ki manbei wa lai kha khon ha kani ka Hospital ymtoh de ka sien wa nyngkong, neibhah chisnem nachwa leh dadep wanrah ya kam kani ka khubor yong kawi ka manbei wa lai kha khon ha kani ka Hospital wa da maad ko yei chitom saja neidaw wa kiwa kreh da ieh ki da ka that hapoh doh yong ka.
Kamtæ ha kani ka kynti leh sa kawi ka manbei kawa naka thaiñ Thadlakseiñ Block, West Jaiñtia Hills District da mih ko chakhmat wow pynsñiaw yei chem saja hadien wa wan kha khon ha kani ka Hospital.
Kani ka manbei da kha ko yei khon ha ka 4 tarik uni u bnai, wei neidaw wym chait bha i khonboo, neiliang ka MCH Hospital da ong ko ya ki u lai noh ki cha kiwi won ki thaw sumaar, kamtæ ha ka 5 tarik da mih ki wei da lai ki cha Woodland WK Hospital, Sabahmuswang, tangwa manda poi ha katai ka Hospital ka leh da sñiaw chitom ko heiwa da sooh i tre kpoh wei tympong.
Kamtæ da khana ko ya ki Doctor ka Woodland wei manda pait thooh ki yei chitom ko chem pathan ki da ka that hapoh doh ko wei da sai ki ka.
Khana ko wa mar ya dep sai ya katai ka that sñiaw wot ko yei pyngngaad.
Kamtæ hajrong ini i jia kani ka manbei da kyntu ko ya ki bor wa toh u pait wym toh u leh khalær ki kamni khnang wa kiwi won leh ki manbei wa lai phah sumaar dei yooluti u yoh i chait i khiah yow lait ki u maad kam ini i chitom saja.
Puræ leh: Da ka that mih na ka manbei wa wan kha khon ha MCH Jowai
Discussion about this post