theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

Da ka that tymmoh kiwa ha yung ya u mot uwa seiñ ya ka Sawlyngdoh HS School

Advertisement ad1

Kam i dak sñiawsih da tymmoh da ka that rong yong ya u mot yong u (L) Thomlin Suchiang uwa man uwa seiñ ya ka Sawlyngdoh Higher Secondary School neidaw wa da mih syndet i khut Interview ya ki ar tylli ki kreh kiwa sikai khlem da mynjur lang ki dkhot (Member).

Ini da pynlyngngoh ko ya kiwa ha yung ha sem yong uwa seiñ ya kani ka skur, wei ini da jia hadien wa dep pynman ya ka Committee da ka SMC (School Managing Committee) heiwa da emlang ki kattu katni ngut ki dkhot ka Executive Committee. Wei ha kani ka yalang ym pu ye wow rai kat hadooh wow pynmih yei khut thap kreh (Application wa Interview) ya kini ki artylli ki kreh (Post) wa lait.

Ya ka Sawlyngdoh Higher Secondary School Mowkaiaw da seiñ da u (L) Thomlin Suchiang nadooh u snem 1970 wei da sdang ya ka ha u snem 1971 wei ka skur da roi ko ha i liang ki khynnah skur wei da e kaam ko leh chiboon ki bru nadooh kiwa man kam kiwa sikai kamjooh kiwa kreh ka skur kattu la 50 snem, heiwa da yoh leh wow lehkmen ya ka Golden Jubilee ha ka 17-12-2021 deiwa emlang u Chief Minister, u Education Minister, u Urban Affairs Minister wa kiwi kiwi ki kynrem ki lyndan deilang wa ki paidbah wa chong chnong kani ka thaaiñ deiwa ya kmen.

Ha kini ki 50 snem uwa seiñ da yaleh chitom u miet wa sngi khlem da chong ngiah yow pynku ya kani ka skur hadooh wa da mylliñ lut u wot ya ki khon ki kti, ya ka yung ka sem wei da man u kam uwa khrong wow lai paan yarap na kylleiñ wei wow pynemkaam wot yeiwa yoh wa em u na yung wow pynbiang yeiwa emkaam wei ki khon yong oo kam uwa seiñ ym yohlaad ki wow psiah kaam ha kani ka skur wa da seiñ da u pa yong ki. Ha kini ki ar snem wa da dep da em kiwa sikai skur kiwa da chong ngiah wei da lait ar tylli ki kreh wa da khut pynman ya ka Interview haka 29-07-2022.

“I kam kiwa ha yung ha sem uwa seiñ ya kani ka skur uwa man u pa yong i da booh i yei kyrpaad ya ka SMC da boonsien wow sñiawbha wow pynpsiah kaam ya ka khon khaddooh yong uwa seiñ ya kani ka skur ha kawi na kini ki Post wei da man i i yaklam ha ka SMC da boonsien wei man ka sien wa i da kyrpaad ya kiwa yahkhmat ka SMC, ki da pteiñ ki wow khanglaad da iwa boon i eh, ki kyndon wei pynbaad wa ka khon yong uwa seiñ ym pu dep ko ya ka B.Ed kamtæ ym ye wow thung kreh. Hawa i pyntip i ya ka SMC wa daw pyndep noh ya ka B.Ed sa du chibnai wei kyrpaad wow yang tangwa da pynsmat pathan ki wow khut yaleh kreh.”

Kamtæ da kylli wa lada ka SMC da yang ko ar snem khlem da thung ya kiwa sikai ileh wym hoi u yang sa chi bnai? Lada ya kiwi kiwa sikai da thung khlem pyndep ya ka B.Ed ileh wym ye u thung ya ka khon uwa seiñ ya ka skur? Ileh wa kiwa ha yung uwa seiñ skur ym em hok ki moh wow yoh kreh ha kani ka skur? Ym toh mo wa da em ki daw wa cha kylla?

Da ong wa ini i kyrpaad da i burom ya kiwa yahkhmat ka SMC khlem da dawa dei bor. “Ini da pynyoo che sakhiat yei yoo beiñ ya uwa seiñ wa i yoobeiñ ya ka yung yong oo. Tangwa neidaw wa ki kyrpaad yong i ym mih soh wei ya ka kyrpaad khian yong i ka bei wa da tymmen, ki khon wa da chah yooh roit hapoh ki sla kjat, kamtæ kam i dak sñiawsih yei wym e laad yong kiwa yahkhmat ka SMC ya ka khon khaddooh uwa seiñ ya ka skur wow yoh kaam ha kani ka skur du na i daw wym pu dep ya ka B.Ed sa du chibnai, i pynsñiaw i yei dak wa sñiawsih deiwa tymmoh da ka that rong yong ya i dur mot sahkynmoo u pa yong ngi ha skur wow kyrpaad ya ki bor wa hajrong wow sñiawbha u tuklar lang ya ini i kaam.

Ka kyrwoh na ka Bliensibon Laloo (ka kurim uwa seiñ ya ka skur), ka Ridalin Laloo (ka khon khaddooh uwa seiñ ya ka skur) wa u Pynbiang Laloo (SMC Member).

Share this:
Previous

Khlaad noh u Bah Cometstar Warjri

Next

Khang tala ka KSU-EJHDU ya ka Toll Plaza ha Lumshnong