Phramer: Ka Enamkiru FC da jop ko ia ka Umulong Beat House FC da ka Tie-Breaker 3-2 kol ha ka iakhun phainal iong ka lympung ialehke kawa tip kam ka “13th Phramer Invitation Football 2015” kawa da pynman daka Phramer Youth Cultural & Sports Club ha Madan phutbol Phramer West Jaintia Hills District haka 10 tarik uni u bnai.
Ha kani ka iakhun phainal da wan wow sakhi chirup u ma LT.Tariang BDO Laskein Block kam u kongsan, u ma Pariat Officer Incharge Traffic Cell, ki dkhot ka Phramer Youth Cultural & Sport Club wa kiwi kiwi kiwa da chah khut sniawbha. Ka Phramer Youth Cultural & Sport Club ha kani ka sngi da booh ko yei kyrpad ia u BDO wow thuh lad thuh luti nei wynta u pynbha pynmiat ia ka madan kawa dang duna ha waroh ki liang.
U ma LT.Tariang kam u kongsan ong uwa na ka liang ka sorkar smat ki u e yei emkam iong ki paidbah tangwa chong wan hei stad iong ka chnong. Hei iatoh wan wa ka ialehke, ong u wa ka phutbol hi man ko iawi na ka ialehke kawa sniawsuk u pait da waroh ka pyrthai, kani ka ialehke ia katni hi man ko kawi na ka lad e kam e jam ia kitu ki bru em isap.
Hawa khyruin wan cha ka kynta iakhun ha pyrdi kini ki ar kynhun, ki nongialehke iong kini ki team da sdang ki u pachat chawah chanein ia ka bol dei thmu wow ioh pynkhih nyngkong ia ka jar, deiwa ha ka minit kawa 17 ka Enamkiru FC da ioh ko u pynkhih nyngkong ia ka jar lyngba u Masan War (Jersey No.11), ka Umulong Beat House FC wan hadien i chah thap da ialeh ko u rah ia ka bol wow pynkhih kylliang ia ka jar, tangwa ki player wa u nongiang kol ka Enamkiru um em u lead ki ia ki, kat kamte ka bol um em u psiah hapoh ka kol hadooh wa kut iong ka kylla step.
Hawa khyruin wan cha ka kylla miet kawa ar kini ki team da ialeh ki katwa ye wow ioh pynkhih ia ka ka jar. Ka Enamkiru FC ialeh ko wow pynkhih ia ka kol ka wa ar katwa ka Umulong Beat House FC wan ialeh ko wow pynkhih kylliang ia kawa da chah thap, manda poi ha ka minit kawa 50 ka Umulong Beat House FC da ioh ko u pynkhih kylliang ia ka kol lyngba u Henry Marboh (Jersey No. 14) lyngba kani ka kol da pyniakhaid ia ka iakhun. Hadien wa kini ki ar team da ioh ki u thap mar kawi samen ka kol, ka bol da lai ko chanein chawah khlem ioh de u pynkhih ar sien ia ka jar hadooh wa kut iong ka kylla miet.
Khnang u ioh ia ka ka rai jop rai rem ki nongpynlai da rah noh ki cha ka Tie-Breaker, ha kawa ka Enamkiru FC da jop ko ia ka Ummulong Beat House FC da 3-2 kol.
Da sam khusnam ia ka kynhun kawa da jop da ka song poisa kawa 1 lakh tyngka wa ka kynhun wa ar (chah rem) 50 hajar tyngka. Da sam leh ia ki khusnam ‘Best Player’ kawa da rah da u Masan War na ka team Enamkiru FC, ‘Best Goalkeeper’ da rah da u Ebor Sutnga na ka team Enamkiru FC, ia ka ‘Top Scorer’ da rah da u Banteilang Shylla na ka Ummulong Beat House FC, katwa ia ka ‘Best Discipline Team’ da rah da ka Giovento FC. Da pynkup warom leh ia ki le ngut ki bru kiwa da nong synniang yei thaw iong ki wow chna ia ka madan phutbol Phramer kynthup ia u ma D. Papang na Shangpung, ka kong S. Lyngdoh wa u ma Karbar Papang uwa pynbit pynbiang ia ka madan.
Discussion about this post