15 49.0138 8.38624 1 0 4000 1 https://wyrta.com 300 0

Jop u Wansa-oo-Dhar ia i nam Paila Ksiar wa ka Tracemon Dkhar kam ka Lasubon Ksiar 2015

0 Comments
Advertisement ad1

Jowai:Ha kani ka 11 tarik Naichiphaw ka iakop Lasubon Ksiar wa u Paila Ksiar 2015 kawa man ha Ïungwalieh Loompyrdi Ïongpiah man ko kawa chongchit, kawa yoosuk yoophieñ wa kawa lai beit lai ryntih ha waroh ki liang.

Da wan iachimbynta ha kani ka iakop da 15 ngut ki khynroo wa 15 ngut ki  khyllood kiwa da iohlad u pynyoo ia i rukom riam tynre, ki chad tynre wa i stat iong ki hei iatoh wa ka Ñiamtre.

Ia ka iakop da pyllai da u ma Petrous Rymbai wa ka kong Anumaheisa Lytan wei da pynman ia kani ka iakop da ka Women’s Welfare Organisation Seiñ Raij Jowai.

Ha ka kylla wa nyngkong ki nong iachimbynta da pynyoo ki ia ki riamtynre kiwa da pynwandur ia ki wa ki riam ka juk wa katni ‘Tradition Blend with Modernity’ kawa pynsakhiat wa i riam tynre man i iwa ryngkat wa kiwi ki riam pyrthai wa katni ha i miat.

Ha ka kylla wa ar ki nongchimbynta da ia mih ki mar chijur chynrang wa kynthai yow pynyoo ia ki sap chad tynre iong ki. Da ioh u sakhi ia ki chad wa boon jait nadooh ki chad pliang, chad kper syntu wa kiwi.

Ha ka kylla wa le ki nongchimbynta da pynyoo ki ia ki riamtynre kiwa boonjait kam ki riam hi i por li e kiad ha ka step ka sngi bia, ka riam chad lahooh, ki riam lai rep wa kiwi kiwa yoo chongkun.

Na kini ki 15 ngut da jied sa 5 ngut na ki chynrang wa 5 ngut na ki kynthai kiwa poi cha ka kylla wa khatdooh itæ toh u jubab ia ki jingkylli na ki nongbichar kiwa e ar tylli ki jingkylli ia nongchimwynta.

Hadien kani ka kylla da jop ka Tracemon Dkhar kawa na Wapung (Poh Chnong) ia i nam Lasubon Ksiar 2015. Ka Tracemon toh kawa da dep BA (Hons) katni won dang puræ ko ia ka LLB ha 12 Dolloi Law College. Ia i nam wa ar da ioh da ka Sñiawlangki Synrem kawa na Dulong, Jowai kawa dang puræ BA 1st Semester ha St. Anthonys’ College, Shillong. Ia i nam wa le won da ioh da ka Sakanidonhi Kyndiah na Loompyrdi Iongpaih, Jowai kawa da pyndep klas 12 science.

Neiliang ki chynrang ia i nam Paila Ksiar 2015 da jop da u Wansa-oo- Dhar na Loompyrdi Iongpiah, Jowai uwa dang puræ klas 11 Arts ha Thomas Jones College. Ia i nam wa ar da ioh da u Dappura Synrem na Dulong (Poh-hali) Jowai uwa dang puræ 11 science ha KJP Synod Mihngi Higher Secondary School. Katwa ia i nam wa le da rah u Sajanksiar Langdoh uwa na Loomiongkjam, Jowai uwa puræ BA, Journalsim ha Sikkim Manipal University, Shillong.

Kiwa jop nynkong da ioh ki leh ia ka song poisa T. 20,000 wa ar T. 15,000 wa le T. 1o,000.

Da em leh ha kani ka sngi ia i pynyoo riam iong ka kong Argentina Pyrbot, ki chad na ka dong Chilliangraij, Loomiongkjam wa ka Panaliar. Da ioh leh ki rwai na ki khynroo khyllood ka chnong Jowai.

Advertisement ad1

0 Comments

Leave a Reply