Ka Thadlaboh Presbyterian Higher Secondary School Jowai haka 29 tarik uni u bnai, da pynman ko yei yakob miat kynthai bha chynrang wa tip kam ka Miss & Mr Silver Jubilee kam chibynta i lehkmen yaka Silver Jubilee ka skur kawa da sdang nadooh ka 7 tarik u Naisaphra 2023.
Ha kani ka yakob da chimbynta da 16 ngut ki khynnah wa puræ Class-9 hadooh Class-12 wei yaka yakob da pynman haki le kylla.
Ha ka kylla wa nyngkong toh kawa tip kam ka Introductory Round deiwa sap da ki riam tynre, heiwa kiwa chimbynta da pynyoo ki yei sap lai hajrong rynsan neitæ da pyntipmit ki ya idæ kamjooh khana ki yei ka-it ka-sar yong ki wa kiwi.
Ka kylla wa ar toh ka Casual Round (Talent Show) heiwa kiwa chimbynta hadien wa mih rynsan da pynyoo haroh ki jar jiar i sap heiwa da em kiwa pynyoo yei sap rwai, sap chaad, sap lehbol, sap dro wa kiwi. Wei ha kani hi ka jooh ka kylla da jied ya 12 ngut kiwa yoo biang u psiah cha ka ya kylla wa khaddooh namo ka Final Round deiwa kyntait 4 ngut wa kynthup ya ar ngut ki kynthai wa ar ngut ki chynrang.
Neitæ haka kylla wa khaddooh won kawa tip kam ka Question Answer Round (Formal Attire) da em i kylli yukylli na kiwa bichar wei jubab na kiwa chimbynta.
Kamtæ hadien i bichaar liang wa nang da kiwa bichaar na waroh le kylla, da pynbna ya kiwa yoh rah yei nam Miss and Mr. Silver Jubilee wada yoh daka Mary Graceful Pakma wa u Leonard Khyriemmujat.
Yei naam Miss Talented da yoh daka Ivalahunshisha Ïakai katwa u Ribait Dkhar da yoh u yei naam Mr. Talented. Yei naam Miss and Mr. Personality da yoh da ka Airina Sungoh wa u Leonard Khyriemmujat.
Kam u pynkynmoo, neiliang ka skur Thadlaboh Presbyterian Higher Secondary School Jowai, chwa kani ka sngi leh da dep pynman ko boon ki jait yakob waphær waphær kam chibynta ka Silver Jubilee.
Discussion about this post