Kam chibynta ka dak i kynmoo warom ya ka lyngkhooh snem yap wa 160 u Kiang Nangbah khlawait ka Ri 12 Dolloi ka wow man ha ka 30 tarik Kmaichonglad 2022, neiliang ka Khynroo Khyllood Committee Seinraij Jowai wa ka Kiang Nangbah Iasiat Khnam Memorial Society, Jowai ha ka Mulong 27 tarik Kmaichonglad da pynman ki ya ka Yakob Siat Khnam Pyllah ha Madan Madiah Kmaiblai.
Ha kani ka yakob dawan ya chimbynta da kiwa boon ki bru na ki chnong waphær wei man ko leh ka yasiat khnam wa yoosuk yoochongchit wot ki khynnah leh dei sñiawkhia yei naam i pyrtuid u Kiang Nangbah boodlate ki wow yachimbynta ha kani ka yakob.
Ha ka yakob siat khnam yong samen (Single) hapyrdi ki waheh wa da pynman da ka Kiang Nangbah Iasiat Khnam Memorial Society, Jowai: U Dapsming Kynjin darah u yei naam jop neitæ boodryngkhi won u Lamet Phawa. Hapyrdi ka ya siatkhnam pyllah yong arngut (Double) u Lamet Phawa wa u Carlin Phawa darah ki yei naam jop neitæ boodryngkhi won u Dapsming Kynjin wa u Budlangki Lakiang. Hapyrdi won ki khynnah hei yong samen (Single) u Lan Phawa darah u yei naam jop boodryngkhi won u Oni Dkhar katwa hapyrdi i Yasiat Khnam Yonglok (Double) u Lemanki Shylla wa u Haunisa Kynjin darah ki yei naam jop boodryngkhi won u Oni Dkhar wa u Wan-i Dkhar.
Kiwa jop won ha ka Yakob Siat Khnam Pyllah yong samen (Single) wa da pynman da ka Khynroo Khyllood Committee Seinraij Jowai toh u Win Lhuid na Ialong boodryngkhi won u Yoochwa Lamin na Jowai neitæ ha ka yakob Siat Khnam Pyllah Yonglok (Double) u Dapsming Kynjin wa u Budlangki Lakiang na Panaliar da rah ki yei naam boodryngkhi won u Baitmi Shylla wa u Hauni Kynjing na Panaliar.
Neiliang ki bor pait bor pynlai yong kini ki yakob da pynbna ki leh wa ya ki khusnaam cha kiwa jop yong kani ka yakob u saam ha ka 30 tarik Kmaichonglad ha ki yalang kynmoo warom ya ka Lyngkhooh Snem Sngi yap wa 160 snem u Kiang Nangbah ka wow man ha Madan Mynkoi Pyrdi Iongpiah hei pynlai ka Seinraij Jowai wa ha Madan Madiah Kmaiblai hei pynlai ka Kiang Nangbah Iasiat Khnam Memorial Society, Jowai.
